Հոկտեմբերի 14-ի գիշերը Արցախում արձանագրվել է նոյեմբերի 9-ից հետո հրադադարի խախտման ամենածավալուն դեպքը, երբ ադրբեջանական զինուժը թիրախավորել է Մարտունու շրջանի Նոր Շեն գյուղի մոտ Արցախի ՊԲ հենակետը, ինչի հետևանքով կա վեց վիրավոր: Բարեբախտաբար հայկական կողմը չունի զոհ: Վիրավորներից երկուսի վիճակը գնահատվել է ծանր, սակայն, ինչպես հայտնել է Արցախի պետնախարար Արտակ Բեգլարյանը՝ վիրահատությունը անցել է հաջող և նրանց կյանքին չի սպառնում վտանգ: Ադրբեջանի զինուժը միաժամանակ կրակոցներ է արձակել շփման գծի այլ ուղղություններով:
«Հելսինկյան նախաձեռնություն-92» Լեռնային Ղարաբաղի կոմիտեի համակարգող, խաղաղության և մարդու իրավունքների միջազգային մրցանակների դափնեկիր Կարեն Օհանջանյանը «Առաջին լրատվական»-ի հետ զրույցում ասաց, որ Ադրբեջանը անթույլատրելի քայլերի է դիմում և կրում է իրավիճակի ողջ պատասխանատվությունը։ Ըստ Օհանջանյանի՝ իրավիճակի ոչ պակաս պատասխանատուներն են նաև ռուսական «օկուպացիոն զորքերը», որոնք գտնվում են Լեռնային Ղարաբաղում՝ քողարկված խաղաղապահ ուժերի անվան տակ․«Բնականաբար վերջին ողբերգական իրադարձությունները ցույց են տալիս, որ կա անհրաժեշտություն, որ Լեռնային Ղարաբաղի հակամարտության գոտում տեղակայվեն միջազգային խաղաղարար ուժեր, քանի որ Ռուսաստանը չի կարողանում կատարել իր պարտականությունները խաղաղությունը պահպանելու հարցում»,-նկատեց մեր զրուցակիցը։
Հարցին՝ արդյոք նման սադրանքը կապ ունի օրերս տեղի ունեցած Պուտին-Փաշինյան հանդիպման հետ, հնարավո՞ր է Բաքվին որևէ բան այդ հարցում չի գոհացրեց, Օհանջանյանը չբացառեց և նշեց․«Եթե հետևում եք ռուսական ու ադրբեջանական կողմի հայտարարություններին, ապա կնկատեք, որ վերջին շրջանում բացակայում է այսպես կոչված «միջանցք» անվանումը և դրա փոխարեն կա խոսք կոմունիկացիաների բացման մասին։ Այսինքն՝ տեղի է ունենում մի այնպիսի բան, որը չի բավարարում Ադրբեջանին ու Ադրբեջանը փորձում է մաքսիմալ կերպով իրավիճակն իր կողմը թեքել՝ այն պայմաններում, երբ Հայաստանը գտնվում է թույլ վիճակում և բարայալքված է»:
Խոսելով այն մասին, արդյոք իրավիճակը կարող է հանգեցնել ավելի լայնածավալ բախումների, Կարեն Օհանջանյանը նշեց, որ այդպես չի կարծում․«Այնտեղ գտնվում են այսպես կոչված ռուսական խաղաղապահ ուժերը։ Միջազգային հանրության աչքին դա երևում է այնպես, որ ռուսական զորքերը պատասխանատու են այդ իրավիճակի համար; Իրենց համար դա ձեռնտու չէ։ Եթե մեծ կռիվ լինի՝ իրենց հարցը միանգամից կլուծվի, կպարզվի, որ նրանք անկարող են անվտանգություն ապահովել։ Բայց միևնույն ժամանակ ես չեմ բացառում, որ նման լոկալ սադրանքները կարող են վերածվել լայնամասշտաբ գործողությունների, որոնք էլ իրենց հերթին կբերեն պատերազմի»,-եզրափակեց նա։