Լուսանկարը՝ Armeniasputnik-ի
Հնդկաստանի արտգործնախարա Սուբրամանյամ Ջայշանկարն, որը երկու երկրների հարաբերության պատմության մեջ առաջին անգամ այց է կատարել Հայաստան, Երեւանում խոսել է Պարսից ծոց-Սեւ ծով միջանցքի կարեւորության մասին: Հնդկաստանի արտգործնախարարը նշել է, որ իր երկիրը ընդհանրապես մեծ նշանակություն է տալիս համաշխարհային առեւտրի հնարավորինս լայն եւ մրցակցային երթուղիների առկայությանը:
Հնդկաստանի նախարարը խոսել է նաեւ այն մասին, որ Դելին Իրանում զարգացնում է նավահանգստային կարողությունները, այդպիսով ընդլայնելով աշխարհի հետ առեւտրային հաղորդակցության հնարավորությունը: Ցավոք, նրա հետ համատեղ ասուլիսի ընթացքում չի խոսվել, ու նաեւ հարց չի հնչել այն մասին, թե արդյո՞ք Հնդկաստանը պատրաստ է առարկայական մասնակցություն ունենալ Հայաստանի տարածքով Պարսից ծոց-Սեւ ծով հաղորդուղու ենթակառուցվածքային զարգացմանը, լինի դա ավտոճանապարհի կամ ավտոճանապարհների, ինչպես նաեւ երկաթուղու տեսքով:
Հնդկաստանը պատրա՞ստ է Հայաստանում ներդրումներ կատարել այդ ուղղությամբ, թե՞ պարզապես արտահայտում է իր շահագրգռությունը, բավարարվելով միայն իրանյան նավահանգստային ենթակառուցվածքներում ներդրում կատարելով: Սա էական է երկու երկրների ռազմավարական հարաբերության գործնականացման, երկկողմ քննարկումների առարկայության տեսանկյունից: Միաժամանակ, այդ հանգամանքը ինքնին կլինի նաեւ երկկողմ քաղաքական ռազմավարական հարաբերության գործնականության ցուցիչ արտաքին խաղացողների համար, ձեւավորելով շահերի որոշակկի նոր միջավայր եւ դիտարկելով այդ միջավայրի շահառուների նոր շրջանակ: Առավել եւս, որ անկասկած է մի բան՝ Հայաստանի տարածքով Հյուսիս-հարավ ճանապարհային միջանցքի զարգացման համար ենթակառուցվածքային շինարարությունը ունի էական թափի անհրաժեշտություն, ինչը պահանջում է էական ներդրումներ:
