ՀՀ վարչապետ Նիկոլ Փաշինյանի որոշմամբ Ալբերտ Մարգարյանը նշանակվել է Գյումրի համայնքի ղեկավարի պաշտոնակատար: Ալբերտ Մարգարյանը երկար տարիներ ղեկավարել է Շիրակի մարզպետարանի քաղաքաշինության վարչությունը: Շիրակի մարզպետարանում զբաղեցրած պաշտոնից ազատման դիմում Ալբերտ Մարգարյանն արդեն ներկայացրել է:
Շիրակի մարզպետի տեղակալ Հովհաննես Զոհրաբյանը հոկտեմբերի 12-ին քաղաքապետարանի աշխատակազմին է ներկայացրել Գյումրի համայնքի ղեկավարի պաշտոնակատարին։ «Պարոն Մարգարյանը պետական կառավարման համակարգում աշխատանքի ու ղեկավարման երկար տարիների փորձ ունի, տեխնիկական գիտությունների թեկնածու է, Հայաստանի Ճարտարագիտական ակադեմիայի իսկական անդամ, իսկ որպես շինարար և քաղաքաշինության բնագավառի փորձառու մասնագետի ներկայացնելու իմաստ չկա»,-ներկայացնելով քաղաքապետի պաշտոնակատարին նշեց Հովհաննես Զոհրաբյանը՝ շնորհակալություն հայտնելով Սամվել Բալասանյանին՝ անցած տարիների աշխատանքի համար։
«Շնորհակալություն եմ հայտնում ՀՀ վարչապետին մեծ վստահության համար, ճիշտ է կարճ ժամանակ է լինելու իմ պաշտոնավարումը, սակայն ամեն ինչ արվելու է քաղաքապետարանի բնականոն աշխատանքը շարունակելու համար»,-շնորհակալություն հայտնելով վստահության համար նշեց Ալբերտ Մարգարյանը:
Հոկտեմբերի 10-ին լրացել է Սամվել Բալասանյանի պաշտոնավարման ժամկետը: Ալբերտ Մարգարյանը կշարունակի պաշտոնավարել մինչև ՏԻՄ ընտրություններից հետո կընտրվի նոր քաղաքապետը:
