Պաշտպան Լուսինե Սահակյանը, որպես բողոքի նշան, լքեց դատական նիստերի դահլիճը։
Դատարանը թույլ չտվեց «Հայաստան» դաշինքի պատգամավոր և ՀՀ նախկին փոխվարչապետ Արմեն Գևորգյանին մեկնել Մոսկվա` մասնակցելու ԵԽԽՎ սոցիալական, առողջապահության և կայուն զարգացման հանձնաժողովի լիագումար նիստին։
Հոկտեմբերի 12-ին Երևան քաղաքի ընդհանուր իրավասության դատարանը շարունակում էր քննել ՀՀ երկրորդ նախագահ Ռոբերտ Քոչարյանի և նախկին փոխվարչապետ Արմեն Գևորգյանի գործով դատական նիստը։
Դատավոր Աննա Դանիբեկյանը հարկ չհամարեց անդրադառնալ ՀՀ նախկին փոխվարչապետ Արմեն Գևորգյանի սահմանային տեղաշարժի արգելքը վերացնելու միջնորդությանը։
Նա նշեց, որ այդ հարցը նախորդ դատական նիստին արդեն քննարկվել է։ Դանիբեկյանը մերժեց նաև պաշտպան Լուսինե Սահակյանի միջնորդությունը, որով նա խնդրում էր թույլ տալ Գևորգյանին 2021 թ-ի նոյեմբերի 30-ից դեկտեմբերի 3-ն ընկած ժամանակահատվածում բացակայել երկրից։ Դատավորը համարեց, որ Գևորգյանը կարող է այդ նիստին առցանց մասնակցել։
Սահակյանը նշեց, որ մինչ օրս նաև հնարավորություն չի ունեցել ծանոթանալու քրեական գործի նյութերին, որովհետև նրան չեն տրամադրել ո՛չ ամբողջական փաթեթը, ո՛չ էլ ծանոթանալու համար ողջամիտ ժամկետ։
Պաշտպանը հայտնեց նաև, որ պատրաստվում է դատավորին ինքնաբացարկի միջնորդություն ներկայացնել։ Դատարանը փորձեց անցնել մեղադրական եզրակացության եզրափակիչ մասի հրապարակմանը, սակայն պաշտպանը Լուսինե Սահակյանը, ի նշան բողոքի դատավորի գործողություններին, լքեց դատական նիստերի դահլիճը։
Դատարանը հետաձգեց նիստը մինչև հոկտեմբերի 19-ը, ժամը 13։00-ն։