Թուրքիայի համբերության բաժակը լցվել է Սիրիայում ահաբեկիչների վերջին «հարձակումների» պատճառով, հայտարարել է նախագահ Ռեջեփ Թայիփ Էրդողանը:
«Մենք առաջիկայում անհրաժեշտ քայլեր կձեռնարկենք, որպեսզի սեփական ուժերով վերացնենք Սիրիայից բխող սպառնալիքները», – ասել է նա ազգին ուղղված հեռուստաուղերձում:
Ինչպես հինգշաբթի օրը հայտարարել է պաշտպանության նախարար Հուլուսի Աքարը, երկրի զինված ուժերը հարևան պետության հյուսիսում ոչնչացրել են հինգ ահաբեկչի՝ ի պատասխան հրթիռակոծության պատճառով թուրք զինվորականի զոհվելու: Հատուկ նշանակության ջոկատի ևս մեկ մարտիկի մահվան և 3 հոգու վիրավորվելու մասին հանրապետության ՆԳՆ-ն զեկուցել է կիրակի օրը:
Երկուշաբթի Գազիանթեփ նահանգի վարչակազմում պատմել են, որ հարձակման է ենթարկվել Քարամիշ քաղաքը, տուժածներ չկան: Հաղորդագրության համաձայն ՝ հրթիռակոծման համար պատասխանատվություն է կրում Սիրիական քրդական «Ժողովրդավարական միություն» կուսակցությունը։
Թուրքիայի բանակը 2016-2019 թվականներին երեք գործողություն է իրականացրել Սիրիայի հյուսիսում ՝ «Եփրատի վահանը» «Իսլամական պետություն» ահաբեկչական խմբավորման զինյալների դեմ, «Ձիթենու ճյուղը» և «Խաղաղության աղբյուրը» քրդերի կազմավորումների դեմ: Անկարայի ուժերի ներկայությունը սահմանամերձ տարածքում Դամասկոսը բազմիցս անօրինական է անվանել և կոչ է արել դուրս բերել զորքերը։