Վրաստանի նախկին նախագահ Միխեիլ Սաակաշվիլիի արտահանձնումն Ուկրաինա բացառվում է, Կիևից ոչ մի հարցում չի ստացվել, հայտարարել է Վրաստանի վարչապետ Իրակլի Ղարիբաշվիլին:
«Դա բացառվում է․ ես հաստատում եմ 100%-ով: Նախ՝ ոչ ոք ( Ուկրաինայում՝ խմբ.) չի պահանջում նրա արտահանձնումը, և նույնիսկ եթե նրանք խնդրեն, ոչ ոք նրան չի հանձնի: Նա ստիպված կլինի առնվազն վեց տարվա պատիժ կրել, որից հետո նա կկարողանա մեկնել ցանկացած երկիր»,- լրագրողներին ասել է վարչապետը:
Սաակաշվիլին Վրաստանում ձերբակալվել էր հոկտեմբերի 1-ին, այժմ նա գտնվում է Ռուսթավի քաղաքի բանտում: Վրաստանում նա ներգրավված է մի քանի քրեական գործերում: Նախկին նախագահը հեռակա կարգով դատապարտվել է բանկիր Սանդրո Գիրգվլիանիի սպանության և պատգամավոր Վալերի Գելաշվիլիին ծեծի ենթարկելու համար: Առաջին դեպքում նա դատապարտվել է երեք տարվա ազատազրկման, երկրորդում՝ վեց: Բացի դրանից, Սաակաշվիլին ներգրավված է 2007 թվականի նոյեմբերի 7 -ին ընդդիմության հանրահավաքը ցրելու, «Իմեդի» հեռուստաընկերության վրա հարձակման և պետական բյուջեից միջոցների յուրացման գործերում, որոնք դեռ ուսումնասիրվում են դատարանում: