Հնդկաստանի արտաքին գործերի նախարար Սուբրամանյամ Ջայշանկարի այցը Հայաստանը կարևոր է ինչպես հետպատերազմյան շրջանում առկա իրողությունների համատեքստում, այնպես էլ քաղաքական, տնտեսական համագործակցության նոր մակարդակի հնարավորություններով:
Այս մասին «Արմենպրես»-ի հետ զրույցում նշեց արևելագետ Արմեն Պետրոսյանն՝ անդրադառնալով Հնդկաստանի արտաքին գործերի նախարար Սուբրամանյամ Ջայշանկարի՝ առաջիկայում Հայաստան կատարելիք այցին:
«Հնդկաստանի ԱԳ նախարարի Հայաստան կատարելիք այցը կարելի է պայմանավորել մի քանի իրողություններով: Առաջինը հետպատերազմյան ժամանակահատվածում մեր տարածաշրջանում ձևավորված նոր ուժային հավասարակշռությունն է, նոր իրողություններն են և այդ տրամաբանությամբ շարունակվող որոշակի գործընթացները, որոնք, անշուշտ, բախվում են նաև Հնդկաստանի շահերին: Մասնավորապես, ինչպես նախապատերազմյան ժամանակահատվածում, պատերազմի ընթացքում, այնպես էլ հետպատերազմյան հատվածում առավել կարծրացող, խորացող Թուրքիա-Պակիստան-Ադրբեջան համագործակցությունն է, որը մեր տարածաշրջանում միաժամանակ ուղղված է Հայաստանի Հանրապետության, Իրանի Իսլամական Հանրապետության դեմ: Այն որոշակի ուղերձներ է հղում նաև Ռուսաստանին, իսկ դեպի արևելք, մասնավորապես, վստահաբար վտանգում է և սպառնում է նաև Հնդկաստանի շահերին՝ հաշվի առնելով Հնդկաստան-Պակիստան բավական երկարաժամկետ հակամարտությունը»,-ասաց Արմեն Պետրոսյանը:
Որպես երկրորդ հանգամանք փորձագետը նշում է Հնդկաստանի գլոբալ հավակնությունները՝ հնարավոր բոլոր տարածաշրջաններում և երկրներում սեփական ազդեցությունը մեծացնելու միտումով: Արմեն Պետրոսյանը հիշատակեց ԱՄՆ-ից եկող ազդակներն այն մասին, որ կարևորվում է Հնդկաստանի աշխարհաքաղաքական դերակատարումը:
«Երրորդ հանգամանքը Հայաստան-Հնդկաստան հարաբերությունների շրջանակն է: Երկու երկրները Հայաստանի անկախացումից ի վեր, ունենալով զարգացման բավական լուրջ նախադրյալներ, այդուհանդերձ, չեն իրացրել համագործակցության իրենց ամբողջական ներուժը: Այնպես, որ և՛ տարածաշրջանում, և՛ աշխարհում, և՛ Հայաստանի համար ձևավորված նոր իրողությունների պայմաններում բավական կարևորվում է այս այցը և նոր հնարավորություններ են բացվում Հայաստան-Հնդկաստան հարաբերությունների համար: Դա և՛ քաղաքական, և՛ տնտեսական, և՛ ենթակառուցվածքների հարաբերությունների օրակարգն է: Որպես օրինակ հատկապես նշեմ Պարսից ծոց-Սև ծով միջանցքի ծրագիրը, որտեղ բնականաբար հաշվի է առնվում Հայաստանի դերակատարումը որպես տարանցիկ երկիր»,-հավելեց փորձագետը:
Այլընտրանքային տրանսպորտային նախագծերը ծառայելու են և՛ Հնդկաստանի, և՛ Իրանի համար, և լինելու են որպես հակակշիռ Թուրքիա-Պակիստան-Ադրբեջան առանցքին իրենց տարանցման հնարավորություններն ընդլայնելու նպատակով
Հնդկաստանի արտաքին գործերի նախարար Սուբրամանյամ Ջայշանկարը հոկտեմբերի 12-13-ը կայցելի Հայաստան: Սա լինելու է Հնդկաստանի արտաքին գործերի նախարարի՝ Հայաստան Հանրապետություն կատարած պատմության մեջ առաջին այցը: Այցի շրջանակում կքննարկվեն երկկողմ հարաբերությունների առաջընթացն ու տարածաշրջանային զարգացումները: Հայաստանում Սուբրամանյամ Ջայշանկարը հանդիպումներ կունենա վարչապետ Նիկոլ Փաշինյանի, արտաքին գործերի նախարար Արարատ Միրզոյանի և Ազգային ժողովի նախագահ Ալեն Սիմոնյանի հետ:
Հայաստանի տարածքային կառավարման և ենթակառուցվածքների նախարար Գնել Սանոսյանը հոկտեմբերի 9-ին ընդունել է ՀՀ-ում Հնդկաստանի արտակարգ և լիազոր դեսպան Կիշան Դան Դեվալին: Դեսպանը հանդիպման ընթացքում ընդգծել է, որ հնդկական կողմը հետաքրքրվածություն է ցուցաբերում Հայաստանում ենթակառուցվածքների զարգացման ծրագրերով և ուրախ կլինի քննարկել այդ ուղղությամբ համագործակցության հնարավորությունները։
