«Առաջին լրատվական»-ի զրուցակիցն է ֆրանսահայ գործարար Վալերի–Աշխեն Գործունյանը
-Տիկին Գործունյան, Նիկոլ Փաշինյանը օրերս Լիտվայում հայ համայնքի հետ հանդիպմանը ասել է, որ ՀՅԴ-ականները Իրանում տարածում են՝ ՀՀ-ում սորոսական կառավարություն է, Սյունիքը հանձնվելու է։ Ընդհանրապես այս կուսակցության վարկը սփյուռքում ինչպիսի՞ն է։
-Ես դաշնակցականների հետ շատ կապ չունեմ, բայց կարող եմ ասել, որ նրանք շատ ավանդ ունեն սփյուռքում։ Հիմա ես նրանց կողմից ակտիվություն չեմ տեսնում։ Ֆրանսիայում վերջին քայլը, որ արեցին, Ֆրանսիայի հայկական կազմակերպությունների հետ համատեղ գերիների ազատ արձակման ցույցն էր։ Ես վատառողջ էի, ներկա չեմ եղել ցույցին, բայց ինձ ասում են, որ շատ քիչ մարդ կար այդ ցույցին, ինչը նշանակում է, որ իրենք այդ ուժը, կշիռը չունեն, ինչպես ունեին ժամանակին։ Անցյալ տարի, երբ մեծ ցույցեր եղան պատերազմի ժամանակ, եղան` շնորհիվ Հայաստանի նոր եկած գաղութի երիտասարդության և ոչ թե Դաշնակցության կամ այլ կուսակցության։ Երիտասարդությունը կարողացավ համախմբել այդքան ժողովրդի, այդքան մեծ ցույցեր կազմակերպեցին։ Եվ ոչ միայն Դաշնակցությունը, սփյուռքի մեջ քաղաքական ավանդական կուսակցությունները պետք է ինքնաքննադատություն անեն, մտածեն, որ պատմությունը փոխվել է, ուրիշ իրականություն է, և արդյոք իրենք ճի՞շտ են, իրենց կեցվածքը ճի՞շտ է, թե սխալ։ Այն օրը, երբ իրենք ինքնաքննադատությամբ կզբաղվեն, իրենց շարքերից կմաքրեն նրանց, այդ օրը կսկսեն գործել։ Ես Ֆրանսիայի հայկական կազմակերպությունների ղեկավարությանն էլ եմ ասում, որ պետք է իրենք թողնեն երիտասադները գան։ Հիմա էլ եմ ասում՝ Դաշնակցություն և մյուսներ, թողեք, որ գան նրանք, որոնք ավելի պրագմատիկ են, ավելի ճիշտ են մտածում, քան հները։ Բայց մենք տեսնում ենք հակառակ պատկերը, կառչած են իրնեց աթոռներից, և դրանք միայն դաշնակցականները չեն։ Բայց պետք է գան երիտասարդները, որոնք ճիշտ կգնահատեն իրավիճակը։ Մե՜ծ գործեր կան անելու Սփյուռքում։
-Վերջին շրջանում ակտիվացել է նաև Քոչարյանը, իր թիմակիցներին ակտիվանալու կոչեր է անում, ասուլիսներ է տալիս։ Ընդհանրապես, Սփյուռքում նրա նկատմամբ ինչպիսի՞ վերաբերմունք է առկա։
-Դժբախտաբար, իսկ իմ դեպքում բարեբախտաբար, քանի որ ես նրան չեմ սիրում, նրա շուրջ չեն համախմբվի, սփյուռքում հետաքրքրություն չկա նրա նկատմամբ, ես նման բան չեմ նկատել։ Ես միշտ հետևում եմ, բայց որևէ մասնավոր հետաքրքրություն նրա նկատմամբ չի եղել, թող շները գոռան, իսկ քարավանը կանցնի։ Իր ժամանակն անցել է, բայց նա դա չի ուզում ընդունել։
Ի վերջո, կա պարզ իրողություն՝ ժողովուրդը որոշեց, որ իրեն չի ուզում, սա է դեմոկրատիան, որքան էլ ուզենք կամ չուզենք, և թող ավելի կառուցողական քայլեր անեն, թե ինչպես անեն օգնեն Հայաստանին, բայց դժբախտաբար իրենց աթոռին կառչած մարդիկ են։
-Սփյուռք-Հայաստան հարաբերությունները ինչպե՞ս եք գնահատում ներկա փուլում։
-Շատ վատ եմ գնահատում, որևէ քայլ այս հարաբերությունների ամրապնդման ուղղությամբ ես չեմ տեսնում։ Երիտասարդներ կան, որ շատ լավ են աշխատում, շատ առողջ են աշխատում, բայց պետք է ամբողջ սփյուռքը կարողանա միավորվել և օգնել Հայաստանին, մանավանդ այսօր, որ այսքան ծանր վիճակ է, պետք է դեմոգրաֆիական խնդիրներ լուծեն Հայաստանում, մարդիկ չպետք է լքեն Հայաստանը։
Ես չեմ գտնում, որ սփյուռքահայությունը միավորված է Հայաստանի շուրջ, և նախկին ուժերը չեն թողնում, որ երիտասարդները գան և իրենք կազմակերպեն իրենց կապերը Սփյուռք-Հայաստանի շուրջ, պետք է հուսանք, որ մի բան կփոխվի։ Հուսանք, որ մինչև մեր մեռնելը Հայաստան-Սփյուռք կապերը կամրապնդվեն։
-Այս իշխանություն անո՞ւմ է քայլեր այդ կապերի ամրապնդման համար։
-Ես իրականում չեմ տեսնում, ես մեծ կամք չեմ տեսնում փոխելու այդ կապերը, կարող է այս կառավարությունը շատ ուրիշ բաներ ունի անելու։ Իշխանությունը պետք է կարողանա արթնացնել Սփյուռքը, սփյուռքը ուժ է, բայց կազակերպված ուժ պետք է լինի։
Ընկերներիցս մեկը ասաց՝ ինչու է հայ լինելը միայն տանջանք․․․ բայց պետք է հուսալ, լավատես լինել վաղվա օրվա համար․․․
