Ինգուշեթիայի նախագահ Յունուս-Բեկ Եվկուրովը հայտարարել է, որ Չեչնիայի և Ինգուշեթիայի սահմանի վրա հարձակում է տեղի ունեցել ներքին զորքերի զինվորների վրա, որի հետևանքով տուժել է 7 մարդ:
«Ներքին զորքերի զինվորականներն իրականացնում էին գրոհայինների հայտնաբերմանն ու վնասազերծմանն ուղղված հատուկ միջոցառումներ:
Նախնական տվյալներով՝ զինվորականների վրա հարձակվել են այն բանից հետո, երբ նրանք լքել են այն տարածքը, որտեղ կատարվում էր հատուկ գործողությունը»,- Интерфакс-ին ասել է Եվկուրովը: Նրա խոսքերով՝ դեռևս հստակ տեղեկություն չկա զոհերի մասին:
Միաժամանակ տեղեկություններ են ստացվել այն մասին, որ Դաղստանի ոստիկանությունը հայտնաբերել է գրոհայինների ամառային ճամբար` պատրաստված մոտ 20 անձի համար, որտեղ հայտնաբերվել է մեծ քանակությամբ զենք և զինամթերք` ինքնաձիգներ, ատրճանակներ, փամփուշտներ և պայթուցիկ սարքեր պատրաստելու համար անհրաժեշտ նյութեր:
