«ՊանԱրմենիան էքսպո-2021» միջազգային եռօրյա ցուցահանդես-ֆորումին մասնակցում է տարբեր ոլորտներ ներկայացնող մոտ 120 կազմակերպություն Հայաստանից, Ռուսաստանից, Գերմանիայից, Իրանից և այլ երկրներից: Մասնակիցներն այցելուներին ծանոթացնում են իրենց ոլորտի նորամուծություններին և առաջարկներին:
Միջոցառման բացման հանդիսավոր արարողությունը տեղի ունեցավ հոկտեմբերի 8-ին «Yerevan Expo» ցուցահանդեսային համալիրում:
«Պրոմ էքսպո» ընկերության հիմնադիր տնօրեն Արման Զաքարյանն ասաց՝ արդեն 12-րդ անգամ են իրականացնում նախաձեռնությունը: «2020 թվականի դժվար ժամանակաշրջանից հետո շատ կարևոր է, որ մեր երկրի տնտեսությունը մեջքն ուղղի, ոտքի կանգնի ու քայլի առաջ, քանի որ դրանից է կախված երկրի զարգացումն ու կայունությունը: Հույս ունեմ, որ մեր միջոցառումն իր փոքրիկ լուման կունենա այս առաջխաղացման գործում»,- ասաց նա:
ՀՀ էկոնոմիկայի նախարար Վահան Քերոբյանը հայտնեց, որ այս տարվա առաջին կիսամյակում ուղղակի ներդրումների ծավալը 23 տոկոսով ավելի շատ է եղել, քան անցյալ տարվա նույն ժամանակահատվածինը: «Այն հավասարվել է 300 մլրդ դրամի: Կարևոր և ոգեշնչող նորություն է, որ մեր վճարային հաշվեկշիռը, այսինքն՝ մեր ընթացիկ հաշիվը կամ առևտրային սալդոն առաջին կիսամյակի համար առաջին անգամ վերջին 17 տարվա ընթացքում ամենաբարձր կետի վրա է: Այն -121, 4 մլն դոլարի է հավասարվել: Նման թիվ 2004 թվականից չենք ունեցել»,- շեշտեց նախարարը:
Նրա խոսքով՝ դա ցույց է տալիս, որ Հայաստանի տնտեսության կառուցվածքը սկսել է փոխվել, արտահանվող ապրանքների քանակը տնտեսության մեջ սկսել է շատանալ:
Քերոբյանը վստահեցրեց, որ կառավարությունն ամեն ինչ անելու է՝ կառուցելու բարձր արտադրողական, արտահանմանը միտված նորարարական տնտեսություն:
«ՊանԱրմենիան էքսպո-2021» ցուցահանդես-ֆորումը, որի նպատակն է բարձրացնել հայրենական արտադրանքի ճանաչման պահանջարկը, մեծացնել արտադրանքի արտահանման ծավալները, խթանել Հայաստանի և արտերկրի միջև համատեղ գործարար և ներդրումային ծրագրերը, ունի բազմաթիվ թեմատիկ բաժիններ: Դրանք են արդյունաբերությունը, գյուղատնտեսությունը և սննդարդյունաբերությունը, բեռնափոխադրումները, ծառայությունները, տեքստիլը, կոսմետոլոգիան, ոսկերչությունը, զբոսաշրջությունը:
Ցուցահանդեսի տաղավարներից մեկում իր հետաքրքիր աշխատանքներն է ներկայացնում նկարիչ Հովսեփ Բարսեղյանը: Նշում է՝ ինքնուս է, սակայն հասցրել է սթրինգ-արտ ստեղծագործությունները ցուցադրել տարբեր հարթակներում: «Մեխերի ու թելերի միջոցով դիմանկարներ և այլ ժանրերի գործեր եմ ստեղծում: Վրձնի փոխարեն թելեր եմ օգտագործում, երբեմն թվացյալ անպետք առարկաները ևս ծառայում են որպես արվեստ ստեղծելու միջոցներ: Նման իրերից են, օրինակ, ժանգոտած երկաթի կտորները»,- պատմեց նա:
Նկարիչը վաճառքն իրականացնում է առցանց. գնորդները ոչ միայն հայերն են, այլև օտարազգիները:
Միջոցառումն իրականացնում են ՀՀ առևտրաարդյունաբերության պալատը և «Պրոմ էքսպո» ընկերությունը: Ցուցահանդեսի պաշտոնական աջակիցներն են ՀՀ կառավարությունը, ՀՀ էկոնոմիկայի նախարարությունը, ՀՀ առևտրաարդյունաբերության պալատը:
«Պրոմ էքսպո» ընկերությունն ստեղծվել է 2007 թվականին: Այն խոշորագույն տարածաշրջանային ցուցահանդեսների, փառատոնների ու համաժողովների կազմակերպիչ է: Ընկերության կազմակերպած միջոցառումները ընդգրկում են տնտեսության բոլոր ոլորտները: