Ձեզ ենք ներկայացնում «Ժառանգություն» կուսակցության տարածած հաղորդակցությունը:
Այսօր «Ժառանգություն» խմբակցությունում պաշտոնական նամակ է ստացվել Ազգային ժողովի տնտեսական հարցերի հանձնաժողովի նախագահ Վարդան Այվազյանից: Նամակում ասվում է. «Ի պատասխան Ձեր ԺԽ-Ե-0732-Ա/10 գրության, տեղեկացնում եմ, որ հանձնաժողովում ունեցել ենք հանդիպումներ «Հայ ձկնաբույծների միության» ղեկավարի և անդամների հետ` ոլորտի խնդիրներին ծանոթանալու նպատակով: Բարձրացված հարցերից մի քանիս արդեն իսկ ստացել են լուծումներ: Ոլորտի հիմնախնդիրների համալիր քննարկման համար դեկտեմբերի կեսերին նախատեսում ենք հրավիրել խորհրդարանական լսումներ»:
Հիշեցնենք, որ ձկնաբուծության ոլորտում առկա հիմնախնդիրների համալիր և հրատապ քննարկման անհրաժեշտության կապակցությամբ նոյեմբերի 19-ին «Ժառանգություն» խմբակցությունը պաշտոնապես դիմել էր ՀՀ փոխվարչապետին` կառավարությունում հարցի քննարկում կազմակերպելու առաջարկով, ինչպես նաև` Ազգային ժողովի Տնտեսական հարցերի ու գյուղատնտեսական և բնապահպանական հարցերի մշտական հանձնաժողովների նախագահներին` նույն հարցերով խորհրդարանական լսումներ անցկացնելու առաջարկով: «Ժառանգությունը» դեռևս պատասխան չի ստացել ՀՀ տարածքային կառավարման նախարարից և գյուղատնտեսական ու բնապահպանական հարցերի մշտական հանձնաժողովի նախագահից: