Կորոնավիրուս Sars-CoV-2 կարող է փոխանցվել մարդուց կենդանիներին, այնուհետև մի շարք մուտացիաներից հետո կրկին անցնել մարդուն արդեն որպես նորագույն կորոնավիրուս Sars-CoV-3 և առաջացնել նոր համաճարակ, չորեքշաբթի օրը նախարարական հանդիպմանն ասել է ամերիկյան-սինգապուրյան բժշկական Duke-NU համալսարանի պրոֆեսոր Վան Լինֆան։
Նոր SARS-CoV-2 կորոնավիրուսը, ինչպես պարզվել է, մարդուն է անցել չղջիկներից, որոնք տարածված են Ասիայում, ինչ-որ այլ կենդանու միջոցով, հանդիպման մասնակիցներին հիշեցրել է պրոֆեսորը: Նա նշել է, որ չղջիկներն ունեն յուրահատուկ իմունային համակարգ, որը թույլ է տալիս վիրուսներին բազմապատկվել և մուտացիա անել կենդանու օրգանիզմում, բայց թույլ չի տալիս հիվանդություններին զարգանալ:
«Կորոնավիրուսային վարակի՝ մարդուց կենդանուն անցնելու դեպքերը նույնպես հայտնի են, համաճարակի ընթացքում բազմիցս գրանցվել են դեպքեր, երբ ընտանի կենդանիները կորոնավիրուսով վարակվել են իրենց տերերից։ Դա կարող է տեղի ունենալ նաև այսպես. ասենք, Sars-CoV-2 կորոնավիրուսով վարակված մարդը ուտելիքի մնացորդը թողնի ինչ-որ տեղ և չղջիկն այն ուտի», – ասել է Վան Լինֆան, որի խոսքը մեջբերում է Straits Times թերթը:
Այս դեպքում, ըստ նրա, կորոնավիրուսը կարող է ևս մեկ անգամ մուտացիա անել չղջիկի օրգանիզմում, ապա անցնել մեկ այլ կենդանու և մի քանի անգամ մուտացիա անել։ Այս կերպ ստացված նոր վիրուսներից մեկը կարող է հետագայում կրկին անցնել մարդու և առաջացնել համաճարակ՝ դառնալով Sars-CoV-3 նորագույն կորոնավիրուս:
«Դա կարող է տեղի ունենալ, օրինակ, ամերիկյան մայրցամաքում, որտեղ SARS-CoV-2 կորոնավիրուսը դեռևս տեղի չղջիկների օրգանիզմներում չկա, ինչպես դա տեղի է ունենում Ասիայում»,- հավելել է պրոֆեսորը:
Որպես ձևափոխված նորագույն կորոնավիրուսի նոր համաճարակին պատրաստվելու միջոց՝ Վան Լինֆան առաջարկել է մանրակրկիտ հետևել չղջիկների և այլ վայրի կենդանիների մոտ հայտնվող նոր վիրուսներին, հետազոտություններ անել՝ նպատակ ունենալով բացահայտել այդպիսի վիրուսների՝ մարդուն անցնելու պոտենցիալը և մշակել մշտական դիտարկման ավելի հուսալի համակարգ աշխարհում վարակիչ հիվանդությունների բռնկումներին հետևելու համար, հաղորդում է Straits Times-ը: