Ռուսաստանի արտգործնախարարությունը տեղեկություն է տարածել արտգործնախարար Սերգեյ Լավրովի և ԱՄՆ պետքարտուղար Էնթոնի Բլինքենի հեռախոսազրույցի մասին, որ տեղի է ունեցել հոկտեմբերի 6-ին ամերիկյան կողմի նախաձեռնությամբ: ՌԴ արտգործնախարարության տեղեկության համաձայն, Բլինքեն-Լավրով հեռախոսազրույցի ընթացքում խոսվել է իրանյան միջուկային ծրագրի մասին, ինչպես նաև երկկողմ օրակարգի այլ հարցերի: Հեռախոսազրույցը տեղի է ունեցել ամմերիկյան կողմի նախաձեռնությամբ: Փաստորեն, ԱՄՆ պետքարտուղար Բլինքենը, որը գտնվում է ի դեպ Ֆրանսիայում, առավոտ ծեգին զանգահարել է Մոսկվա և խոսել Լավրովի հետ, որը հոկտեմբերի 6-ին Մոսկվայում պատրաստվում է ընդունել Իրանի արտգործնախարար Աբդոլահիանին:
Ակնառու է, որ ԱՄՆ պետքարտուղարի հեռախոսազանգը պայմանավորված է հենց այդ հանդիպման հետ կապված իրողություններով, ինչի մասին ակնառու վկայում է և այն, որ հեռախոսազրույցի ընթացքում Բլինքենն ու Լավրովը քննարկել են իրանյան միջուկային ծրագրի շուրջ ստեղծված իրավիճակը, ինչը ՌԴ ԱԳՆ տարածած հաղորդագրության մեջ փաստորեն զրույցի օրակարգի վերաբերյալ միակ կոնկրետ հիշատակումն է: Ի՞նչ է փոխանցել Բլինքենը Լավրովին կամ ինչ է առաջարկել իրանյան միջուկային ծրագրի առնչությամբ, բնականաբար չի մանրամասնվում և հայտնի չէ, սակայն Իրանի արտգործնախարարին Մոսկվայում ընդունելուց առաջ Լավրովի զրույցը Բլինքենի հետ վկայում է կամ հաստատում, որ վերջին օրերին Իրանի մտահոգությունների դրսևորումը՝ Ադրբեջանի հետ լարվածության տեսքով, Իսրայելի ներկայության մասին հիշատակումներով, խոշոր հաշվով թելադրված է ոչ թե Հայաստանի հետ կապված «միջանցքային» մտահոգություններով՝ ինչը Հայաստանի հանրային մի շարք շերտերում տարածված համոզում է, այլ հենց իր միջուկային ծրագրի շուրջ ստեղծված իրավիճակով:
Իրանին անհանգստացնում է այդ իրավիճակը և Իրանի արտգործնախարարն ըստ երևույթին Մոսկվա է մեկնել ակնկալիքով, որ Ռուսաստանը կաջակցի այդ հարցում Իրանի վրա հասունացող ճնշումը թուլացնելու համար: Կաջակցի՞ Ռուսաստանը, թե ոչ: Կամ՝ կաջակցիի Նահանգների՞ն, թե՞ Իրանին: Համենայն դեպս այն, որ ՌԴ արտգործնախարարության մեջ որպես Բլինքեն-Լավրով զրույցի միակ կոնկրետ հարց ներկայացվում է իրանյան միջուկային ծրագրի շուրջ բանակցային հեռանկարի հարցը, խոսում է այն մասին, որ Իրանին աջակցության համար Մոսկվան կպահանջի բավականին բարձր գին, եթե իհարկե ստիպված չլինի այդ աջակցության համար էլ ավելի բարձր գին վճարել ԱՄՆ-ին:
