Վրաստանի նախկին նախագահ Միխեիլ Սաակաշվիլիի և Ուկրաինայի Գերագույն ռադայի պատգամավոր Ելիզավետա Յասկոյի մտերիմ հարաբերությունների մասին սենսացիոն լուրը հայտնի դարձավ Սաակաշվիլիի ձերբակալության օրը՝ հոկտեմբերի 1-ին:
Այժմ Ելիզավետա Յասկոն Վրաստանում է: Հոկտեմբերի 5-ին նա այցելել է Ռուսթավիի քաղաքային բանտում գտնվող Սաակաշվիլիին: Նրա հետ 1․5 ժամ տևած հանդիպումից հետ Յասկոն, հրաժարվելով խոսել անձնականի մասին, հայտարարել է, որ նախանձում է Վրաստանին, որ Սաակաշվիլիի նման նախագահ է ունեցել։
«Մենք Ուկրաինայում շատ ենք նախանձում, որ դուք ունեցել եք այնպիսի նախագահ, ինչպիսին Սաակաշվիլին է: Նա նաև ուկրաինացի քաղաքական գործիչ է: Ես իսկապես ուզում եմ, որ դուք նրան պաշտպանեք», – ասել է Յասկոն՝ նշելով, որ հպարտ է Սաակաշվիլիի արարքով:
31-ամյա Ելիզավետա Յասկոն քաղաքագետ է, մշակութային փորձագետ, Գերագույն ռադայի պատգամավոր «Ժողովրդի ծառա» կուսակցությունից, ԵԽԽՎ-ում ուկրաինական պատվիրակության նախկին նախագահ:
