Անցյալ ուրբաթ օրվանից ի վեր 76 օտարերկրացիներ են ձերբակալվել Գերմանիայի Սաքսոնիա դաշնային նահանգի սահմանը Լեհաստանի հետ ապօրինի հատելու փորձի համար: Այս մասին երկուշաբթի` հոկտեմբերի 4-ին, հաղորդել է Լյուդվիգսդորֆի դաշնային ոստիկանությունը: Ըստ ոստիկանության` դրանք Սիրիայի, Իրանի և Եմենի քաղաքացիներ են, բոլորը ձերբակալվել են: Բացի դրանից՝ ձերբակալվել է երեք մարդ, որոնք փորձել են փախստականներ տեղափոխել Գերմանիա, նրանցից մեկը տեղավորվել է նախնական կալանքի կենտրոն:
Անցյալ շաբաթ Գերմանիայի դաշնային ոստիկանությունը կրկին հայտնել է Լեհաստանի հետ սահմանին միգրանտների թվի աճի մասին: Ճգնաժամի սկզբից մինչև այս տարվա սեպտեմբերի վերջ ընդհանուր առմամբ ձերբակալվել են 1556 անօրինական ճանապարհով մուտք գործած միգրանտներ, օգոստոսին գրանցվել է 225 անօրինական սահմանահատման դեպք, իսկ սեպտեմբերին՝ 1305:
Ըստ այս թվերի` անօրինական ներգաղթյալների մեծ մասը Իրաքի քաղաքացիներ են: Բացի դրանից` ձերբակալվածների թվում կան մարդիկ Սիրիայից, Իրանից և Եմենից:
Լուկաշենկոյի ռեժիմի «հիբրիդային հարձակումը» ԵՄ-ի դեմ
Մայիսին Բելառուսի ղեկավար Ալեքսանդր Լուկաշենկոն արձագանքեց Արևմուտքի ավելի խիստ պատժամիջոցներին ՝ ասելով, որ Մինսկն այլևս չի խանգարի փախստականներին տեղափոխվել ԵՄ երկրներ: Դրանից հետո անօրինական միգրանտների հոսքը կտրուկ աճեց ՝ առաջին հերթին դեպի Լիտվա: Լիտվա-բելառուսական սահմանի ամրապնդումից հետո հոսքն ուղղվեց դեպի Լեհաստան:
Սեպտեմբերի կեսերին Եվրահանձնաժողովի նախագահ Ուրսուլա ֆոն դեր Լյայենը հայտարարել էր, որ Եվրամիությունը պատրաստ է դիմակայել «հիբրիդային հարձակմանը», որի համար բելառուսական իշխանությունները օգտագործում են միգրանտներին:
«Մինսկի վարչակարգն օգտագործում է մարդկային կյանքը որպես գործիք իր նպատակներին հասնելու համար: Նրանք այդ մարդկանց նստեցրին ինքնաթիռներ և բառացիորեն հրեցին դեպի ԵՄ սահմաններ: Սա չի կարող հանդուրժվել, և Եվրոպայի արագ արձագանքը դա ցույց տվեց»,- ընդգծել է Ուրսուլա ֆոն դեր Լայենը:
Լեհաստանի և Բելառուսի սահմանին հակամարտության հետևանքով մի քանի միգրանտ արդեն մահացել է: Եվրամիությունը պատրաստում է Լուկաշենկոյի ռեժիմի դեմ պատժամիջոցների հինգերորդ փաթեթը: Բրյուսելն այս որոշման պատճառներից մեկն անվանել է միգրանտների՝ Մինսկի կողմից որպես ԵՄ դեմ գործիք օգտագործելը:
