1950-2020 թվականների ընթացքում Ֆրանսիայում առնվազն 216 000 անչափահաս դարձել է հոգևորականների և կրոնական գործիչների կողմից սեռական բռնության զոհ, ասել է եկեղեցում սեռական բռնության անկախ հանձնաժողովի ղեկավար Ժան-Մարկ Սովեն:
«Բնակչության շրջանում անցկացված հետաքննությունը պարզեց, որ Ֆրանսիայի 18 տարեկանից բարձր բնակչության շրջանում 216 հազար մարդ անչափահաս ժամանակ սեռական բռնության է ենթարկվել քահանաների կամ կրոնական գործիչների կողմից»,- երեքշաբթի մամուլի ասուլիսի ժամանակ ասել է Սովեն՝ ներկայացնելով հանձնաժողովի համապատասխան հաշվետվությունը:
Սովեն նշել է, որ խոսքը միայն այն տուժածների մասին է, որոնք ողջ են: «Տուժածները, որոնք այսօր արդեն ողջ չեն, բնականաբար, հաշվի չեն առնվել»,- ասել է նա:
Նշենք, որ Ֆրանսիայի եկեղեցում սեռական բռնության անկախ հանձնաժողովը ստեղծվել է 2019 թվականին:
Ինչպես հայտնել ենք, եկեղեցում սեռական բռնության հարցերով անկախ հանձնաժողովի հետաքննության արդյունքները ցույց են տվել, որ Ֆրանսիայում կաթոլիկ եկեղեցու ավելի քան 3000 ծառայող ներքաշված է եղել մանկապղծության մեջ։