Չեխիայի վարչապետ և դոլարային միլիոնատեր Անդրեյ Բաբիշը խոստովանել է, որ 2009 թվականին 16 անշարժ գույք է գնել օֆշորի միջոցով: Այս մասին նա պատմել է չեխական հեռուստատեսությանը տված հարցազրույցում, փոխանցում է «ՌԻԱ Նովոստի»-ն:
«Դա արվել էր անշարժ գույքի ֆիրմայի առաջարկությամբ, վերջինս խորհուրդ էր տվել այն գնել փաստաբանի միջոցով: Սրա մեջ ոչ մի անօրինական բան չկա: Ավելին, 2009 -ին ես դեռ քաղաքականությամբ չէի զբաղվում»,- բացատրել է քաղաքական գործիչը՝ նշելով, որ ձեռք բերած անշարժ գույքը գտնվում է Ֆրանսիայում:
Ներկայում Բաբիշը Չեխիայից դուրս ոչ մի օֆշորային ընկերություն կամ անշարժ գույք չունի:
Ավելի վաղ Բաբիշն արձագանքել էր Լրագրողների միջազգային կոնսորցիումի՝ «Պանդորայի դոսյե» լայնածավալ հետաքննության արդյունքներով հնչեցված մեղադրանքներին՝ Ֆրանսիայում օֆշորների միջոցով 22 մլն դոլար արժողությամբ ամրոց գնելու վերաբերյալ։ Նա նշել է, որ «երբեք անօրինական կամ վատ բան չի արել»: Նա հրապարակումն անվանել է Չեխիայում կայանալիք խորհրդարանական ընտրությունների արդյունքների վրա ազդելու և իրեն վարկաբեկելու փորձ:
Կիրակի Հետաքննող լրագրողների միջազգային կոնսորցիումը (ICIJ) հրապարակել էր «Պանդորայի դոսյե»-ն, որը բացահայտում էր ավելի քան 100 միլիարդատերերի, 35 համաշխարհային առաջնորդների և 400 պետական պաշտոնյաների օֆշորային գործարքները: Սա պատմության մեջ օֆշորային տվյալների ամենամեծ արտահոսքն է: 117 երկրների ավելի քան 600 լրագրողներ վերլուծել են ավելի քան 11.9 միլիոն ֆայլ:
