«Առաջին լրատվական»-ի հարցերին պատասխանել է ԱԺ «Քաղաքացիական պայմանագիր» խմբակցության պատգամավոր, պաշտպանության նախկին փոխնախարար, գեներալ Գագիկ Մելքոնյանը
Պարոն Մելքոնյան, երեկ ասուլիսում Ռոբերտ Քոչարյանը հայտարարել է, որ շատ փաստեր կան, որոնք վկայում են, որ պատերազմի ավարտը պլանավորված է եղել: Դուք, որ ինքներդ մասնակցել եք պատերազմին, ինչպե՞ս եք գնահատում այս հայտարարությունները:
Երևի իրենց կողմից է եղել պլանավորված, որովհետև պատերազմի 2-րդ, թե 3-րդ օրը, երբ իրենք գնացին Ղարաբաղ, մինչև իրենց գնալը պաշտպանությունը կազմակերպված էր շատ հոյակապ ձևով: Իրենց գնալ-գալուց հետո արդեն հարավային կողմը խառնվեց իրար, թե սպաների, թե զինվորների մեջ լուրեր տարածվեցին, թե իբր հողերը ծախված են, ինչու եք կռվում, թողեք գնացեք: Հարյուրավոր այդպիսի փաստեր կան:
Նա խոսում է պլանավորված պարտության մասին:
Դա իրենք պետք է ասեն, որ գնացին Ղարաբաղ, այդ ի՞նչ արեցին, իրենց գնալու նպատակը ո՞րն էր: Որ այդ հարցին պատասխանեն, ամեն ինչ կընկնի տեղը: Իրենք գնացին, իրենց հետ գալուց հետո սկսվեցին նահանջները, պարտությունները, դասալքությունը և այլն:
Քոչարյանը հայտարարում է, որ Ջաբրայիլից մինչև Շուշի ոչ մի խրամատ չի փորվել, անհասկանալի է, թե ինչու:
Ինքը ճիշտ է ասում, 20 տարի իրենց ձեռքն էին այդ տարածքները, 20 տարում քանի՞ խրամատ են փորել, էս վերջին 3 տարո՞ւմ պետք է արվեր ամեն ինչը: Բա մինչ այդ պաշտպանական 2-րդ, 3-րդ գծերն ո՞ւր էին: Թող մի հատ իրենց արածից խոսեն: Եթե ասում են՝ պլանավորված էր պարտությունը, թող ասեն՝ ում կողմից էր պլանավորված, թող անուններ տան: բանակի հրամանատարության հե՞տ է պլանավորված, ուրեմն թող բանակի ղեկավարությունն ասի, այո, մեզ հետ պլանավորված է, մեզ ասել են՝ չկռվեք և այլն: Այդ հարցերը հենց այնպես օդում խոսալով չի: Ինքը ընտրություններում պարտվել է, հիմա նորից ռևանշ է ուզում վերցնել, չի ստացվի: Ինչպես իր քաղաքական թիմը խորհրդարանում հայտարարում է՝ մենք չենք եկել այստեղ աշխատելու, եկել ենք իշխանություն վերցնելու: Այսինքն էս մարդը չի հանգստանում, այսքան արյունից, այսքան պարտությունից հետո չի հանգստանում, էս երկիրն ուզում է տանի արյունահեղության թե ներքին, թե արտաքին: Սա է իրենց նպատակը: Ժողովուրդն էլ դա շատ լավ է հասկացել: Հիմա ժողովուրդը նայում է ու զզվում է այդ հարցազրույցից: Ինչի՞ համար է ասուլիս տալիս, ուզում է նորից թի՞մ հավաքի, ուզում է իշխանության գա՞լ:
Դե արդեն հայտարարել է, որ ակտիվացնելու են պայքարը, այդ թվում փողոցային պայքար է լինելու:
Սրանք դեռ խելքները գլուխները չեն հավաքել, որ եթե ժողովուրդը երկրորդ անգամ ոտքի կանգնեց, բոլորին կտրորի, կանցնի:
Նա նաև նշել է, որ իշխանությունները փորձելու են պարտության ամբողջ մեղքը բարդել բանակի ու գեներալների վրա:
Ասում է՝ բարդում են բանակի ու գեներալների վրա, իսկ ո՞ւմ վրա բարդեն, տրեստի կառավարիչների՞, թե՞ սուի պետերի: Եկեք գնանք մի հատ տրեստի կառավարիչ ձերբակալենք, ասենք՝ դու պարտվել ես: Բանակն է պարտվել, բանակի գեներալները պետք է պատասխան տան դրա համար, բա ո՞վ պետք է տա:
Իսկ ինչպե՞ս եք գնահատում վերջին օրերին բարձրաստիճան զինվորականների ձերբակալությունը, այդ թվում պաշտպանության նախկին նախարար Դավիթ Տոնոյանի: Այս շղթան ո՞ւր է տանում:
Այս ձերբակալությունները եթե եղել են, ուրեմն ինչ-որ հիմք կա: Հիմա գործը նախաքննության ընթացքում է, այդ շրջանը կավարտվի, այդ մարդիկ կարող է անմեղ դուրս գան, կարող է՝ մեղավոր: Այդ ժամանակ արդեն ամեն մարդ իր գնահատականը կտա և ամեն մարդ իր պատիժը կստանա:
Քոչարյանն ասում է՝ գեներալները պետք է սկսեն խոսել, պատմել ճշմարտությունը; Ի՞նչ է ակնարկում, ձեր կարծիքով:
Իհարկե, պետք է խոսեն, պետք է բոլոր գեներալներն ասեն՝ ինչու չկռվեցին, ինչու նստեցին Ստեփանակերտի կենտրոնում ու չմասնակցեցին պատերազմին: Ո՞ւմից են հրահանգ ստացել, որ չեն կռվել, դա էլ պետք է ասեն: Քննիչ հանձնաժողովն այդ բոլոր հարցերը օբյեկտիվորեն կհանի ջրի երես: