«Առաջին լրատվական»-ի զրուցակիցն է Արցախի արտգործնախարար Դավիթ Բաբայանը։
–Պարոն Բաբայան, Ռուսաստանի արտգործնախարարության տեղեկատվության դեպարտամենտի փոխտնօրեն Ալեքսեյ Զայցևը հայտարարել է, որ ԵԱՀԿ Մինսկի խմբի համանախագահների այցը Լեռնային Ղարաբաղ կնպաստի բարենպաստ պայմանների ստեղծմանը կազմակերպելու Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի հնարավոր հանդիպումը։ Ինչքանո՞վ է կարևոր ԵԱՀԿ Մինսկի խմբի աշխատանքների վերսկսումն Արցախի համար։
–Ես կարևորում եմ Մինսկի խմբի համանախագահների տարածաշրջան կատարելիք այցը։ Սա նախևառաջ բանակցային գործընթացի կարևոր բաղադրիչներից է, թույլ է տալիս տեղում ծանոթանալ բոլոր զարգացումները։ Բնական է ՝ նրանց այցելություններ ու հանդիպումները ավելի էֆեկտիվ են դարձնում խաղաղ կարգավորման գործընթացը։ Մենք շահագրգռված ենք բանակցային գործընթացի վերսկսմամբ ու Արցախի անմիջական մասնակցությամբ։ Բնական է լիարժեք ձևով բանակցային գործընթացը շատ շուտ չի վերականգնվելու ու չի լինելու պաշտոնական Ստեփանակերտի մասնակցություն, բայց այդ հանդիպումները կնպաստեն խաղաղության ու կայունության պահպանմանն ավելի էֆեկտիվ ձևով։
-Նման հանդիպումներն արդյոք չեն հերքի Ալիևի այն խոսքերը, թե ղարաբաղյան հարցը կարգավորված է։
-Բնական է, որ ղարաբաղյան հարցը լուծված չէ։ Եթե լուծված լիներ, պետք է համապատասխան հայտարարություն լիներ, Մինսկի խումբն առհասարակ դրանից հետո պետք է դադարեր գոյություն ունենալ։ Բայց այս ամենը չկա, հետևաբար պարզ է, որ հարցը լուծված չէ՝ անկախ նրանից, թե Ադրբեջանը ինչպես է այդ հարցը դիտարկում։ Իրավիճակն այնպես չէ, ինչպես Բաքուն է փորձում ներկայացնել։
-Հնարավո՞ր է այդ հանդիպումներով փորձ արվի խաղաղության համաձայնագրի ստորագրմանը հասնել։
-Նայած ինչ պայմանագիր։ Եթե իրենք առաջ են քաշում իրենց ուզած պայմանագիրը՝ դա չի կարող ընդունվել, այն պարզ պատճառով, որ Արցախը երբեք չի կարող լինել Ադրբեջանի կազմում։ Սա բերելու է կա՛մ Արցախի կործանմանը կա՛մ այստեղից ազգաբնակչության մասսայական դուրս գալուն։ Այլ տարբերակ չկա։
