Անկեղծորեն մի բան եմ ուզում հասկանալ․
Եթե Սերժ Սարգսյանը փաստերով տիրապետում է, որ 2018-ի հեղափոխությունը տեղի է ունեցել դրսի ուժերի մեծ օժանդակությամբ, ու դրա մասին լռում է, նա հանցագործ է, ով թաքցնում է ազգային անվտանգության համար առանցքային ու ճակատագրական հանցագործության մասին․ քանզի պետության ներքին գործերին դրսից խառնվելը հանցագործություն է, դրսից իշխանություն ձևավորելը՝ նույնպես։ Իսկ այդ իշխանությունը արդեն 2 անգամ ընտրություններով է ձևավորվում, ու ստացվում է, որ 2 անգամ էլ մեր ժողովրդի անվան տակ դրսից իշխանափոխություն է իրականացվում, իսկ Սերժ Սարգսյանը դրա մասին գիտի․․․
Եթե Սերժ Սարգսյանն այսպես փոխաբերական լեզվով՝ “դրսի ուժեր”-ի բառամթերքի տակ մուռ է հանում սեփական ժողովրդից, ով ցանկացել է ազատվել չընտրված իշխանություններից և իրենից, ուրեմն պետք է ասել, որ հայ ժողովուրդը և Հայաստանը պարտություն կրել են ոչ թե Ալիևից, նրա հորից կամ Ադրբեջանից, այլ հենց իրենցից․․․
Եթե Սերժ Սարգսյանը սա ասելու համար այլ առիթներ ունի՝ զորօրինակ Քաջարանի պղձնամոլիբդենային գործարանում բաժենտոմսերի փոփոխությունը /որն օրինակ կարող էր շոշափել իր ընտանիքից կամ Պատիվ ունեմից որևէ մեկի տնտեսական շահերը/, կամ ապօրինի որևէ գույքի շուրջ կատարվող՝ մեզ անհայտ որևէ գործընթաց, կամ իր ժամանակ պաշտոնավարած բարձրաստիճան զինվորականների կոռուպցիոն գործարքների մասին վերջին օրերի չմարող ու թափ հավաքող սկանդալը քողարկելու /միգուցե այն ավելի “վերև” է՞լ կարող է հասնել/ քայլ է, ապա լավ կանի վազն անցնի թե՛ յուր ժողովրդին, թե՛ Ալիևին, թե՛ 2018-ին և ուղիղ բառերով խոսի․․․
Խիստ կասկածում եմ, որ Սերժ Սարգսյանը այդքան պարզունակ է ու չգիտի, որ 2018-ին ժողովուրդն իրեն տեսնել չէր ցանկանում, ցանկանում էր իր կամ Քոչարյանի կառավարումը պատմության գիրկն ուղարկել և դրա համար հեղափոխություն արեց և ոչ թե որևէ մեկին իշխանության բերելու համար։ Ու եթե Սերժ Սարգսյանին պարզունակ չենք համարում, ուրեմն կարծես թե գործ ունենք կամ երկրորդ կամ երրորդ տարբերակի հետ․․․
Այլապես եթե նա ուզում էր Ալիևին հակադարձել, նա դա կաներ ուղիղ՝ առանց տեքստում այսպիսի վերջաբանի։ Եվ արդյո՞ք պարտադիր էր դա անելիս սեփական ժողովրդին վիրավորելը՝ թե իբր վերջինիսի պոլի շորի փոխարեն օգտագործել են դրսից ու ոտքեր մաքրել երկրի վրա․․․ Միգուցե ետ շրջվի ու հիշի, թե իրենց իշխանության տարիներին ո՞վ էր այդպես վարվում սեփական ժողովրդի հետ․․․
