Վրաստանի տարածքով իրականացվող բեռնափոխադրումների մեծ ծավալի, ինչպես նաև ՌԴ Վերին Լարս անցակետում ընթացող շինարարական աշխատանքների հետևանքով Թբիլիսիի շրջանցիկ ճանապարհի հատվածում առաջացել են բեռնատար մեքենաների կուտակումներ։ Վրաստանում ՀՀ դեսպանությունը խորհուրդ է տալիս հնարավորության դեպքում Բագրատաշեն-Սադախլո անցակետի փոխարեն բեռնափոխադրումներն իրականացնել Բավրա-Նինոծմինդա անցակետով։
Այս առնչությամբ, ՌԴ-ում ՀՀ դեսպանությանը կից մաքսային կցորդ Արամ Թանանյանը «Առաջին լրատվական»-ի հետ զրույցում նշեց, որ այս պահին էլ կան կուտակումներ Վրաստանում. «Մեկ շաբաթվա ընթացքում բավական մեքենա կուտակվեց, որի հիմնական պատճառը Թուրքիայից մեծ հոսքերն են: Թուրքիա-Վրաստան անցակետով բավական մեծ թվով բեռնատարներ են անցնում, և այդ բոլորն ուղղվում է դեպի Լարս: Նրանք մի այլ ճանապարհ էլ ունեն, կարող են Կարմիր կամրջի անցակետով Վրաստանից մտնել Ադրբեջան, ապա Ռուսաստան: Մի մասը հենց այդ ճանյապարհով էլ գնում է, բայց դա բավական երկար է՝ չհասված ծախսերը: Դրա համար բեռնափոխադրողները նույնիսկ համաձայն են մի քանի օր կանգնել, բայց ավելի կարճ ճանապարհով մուտք գործեն Ռուսաստան»,-ասաց նա՝ հավելելով, որ եղել է, որ 3-5 օր բեռնատարները կանգնել են:
Թանանյանի խոսքով, հայկական կողմն աշխատում է վրացիների հետ, քննարկում են տարբեր տարբերակներ, որպեսզի ինչ-որ չափով թեթևացնեն հոսքը, կամ հայ բեռնափոխադրողներին վերապահումով մոտենան, որովհետև, ի տարբերություն վրացական, թուրքական փոխադրողների, հայերը մաքսային ամբողջական ձևակերպումներ չեն անում. «Մենք ընդամենը տրանզիտը ձևակերպում ենք Հայաստանում, և տրանզիտը փակում ենք Ռուսաստանում: Այսինքն դա մեկ մեքենայի համար տևում է 15-20 րոպե, այն դեպքում, երբ թուրքերի ու վրացիների համար դա կարող է մեկ ժամ տևել: Այդ պատճառով էլ ռուս մաքսավորները նախընտրում են, որ հայկական բեռնատարները շատ լինեն: Օրինակ, երեկվա ընթացքում շուրջ 430-440 բեռնատար է մտել ՌԴ Լարսով, որից շուրջ 100-ը հայկական է: Դրանից բացի, շոտ 350 մարդատար մեքենա է մտել:
Սովորաբար ցերեկվա ժամերին սպասարկում են մարդատար մեքենաներին, իսկ երեկոյան ժամը 9-ից հետո միայն բեռնատարներին»,-ասաց Թանանյանը:
Նա հիշեցրեց, որ Լարսի անցակետը հիմա հիմնովին վերակառուցվում է, որը կտևի 2 տարի. «Լարսում կա 7 գիծ մուտքի և 7 գիծ ելքի: Դուք հիշում եք, որ ասում էին, որ Հայաստանի համար առանձին կանաչ գիծ կա, բայց խնդիրը Լարս հասնելն է, քանի որ Վրաստանում կուտակումներ են: Եթե հայկական բեռնատարը հասավ Լարս, հաստատ չի ուշանալու: Հիմա ասել, որ կուտակումները թեթևացել է, չի կարելի: Այս պահին երևի ընդհանուր 2000-ից ավելի մեքենա կա հերթում կանգնած, որից շուրջ 450-500-ն են հայկական:
Լարսի անցակետի հզորությունը կազմում է օրական 175 բեռնատար երկու կողմերից, 200 մարդատար մեքենա և 30 ավտոբուս: Այս պահին բեռնատարների թիվը երկու կողմում հասնում է հազարի: 200 մարդատարի փոխարեն, բաց է թողնում 550-600 մարդատար»,-ընդգծեց նա:
