Կորոնավիրուսային հիվանդությամբ պայմանավորված տեսողական խնդիրներով հիվանդների դիմելիությունը Հայաստանում ավելացել է: «Արմենպրես»–ի մամուլի սրահում հրավիրված ասուլիսում Ս.Վ. Մալայանի անվան ակնաբուժական կենտրոնի աչքի բորբոքային հիվանդությունների բաժանմունքի վարիչ Աննա Հովակիմյանը նշեց, որ կորոնավիրուսային հիվանդության ազդեցությունից զերծ չի մնում տեսողական համակարգը:
«Շատ են դիմել ու դիմում աչքի տարբեր խնդիրներով: Ամենից տարածված խնդիրը կոնյուկտիվիտն է՝ աչքերի արտադրությունը: Դիտվում են ավելի ծանր ախտահարումներ, աչքի խոռոչում լուրջ բորբոքումներ, բավական շատ հանդիպում են ակնահատակում թրոմբոզներ: Ունենք նաև կուրության դեպքեր»,-ասաց Աննա Հովակիմյանը: Մասնագետը նկատեց, որ բժիշկների գործը բավական բարդացել է: Կորոնավիրուսով պայմանավորված՝ շատերը, հատկապես բարձր տարիքով անձինք, տևական ժամանակ տնից դուրս չէին գալիս, հետաձգում էին բժշկի այցելությունները: Արդյունքում՝ դիմում են ուշացած:
