Առաջիկա օրերին Ռուսաստանը կսկսի երկրից վտարել անօրինական միգրանտներին, որոնք չեն կարողացել կարգավորել իրենց իրավական կարգավիճակը: Ըստ ՌԴ օրենսդրության, օտարերկրյա այն քաղաքացիների նկատմամբ, որոնք սեպտեմբերի 30-ից հետո անօրինական կարգավիճակում կլինեն, կկիրառվեն Դաշնային օրենքի 115-րդ հոդվածի նորմերը, որոնք ներքին գործերի մարմինների աշխատակիցներին թույլ են տալիս վարչական միջոցներ ձեռնարկել՝ ընդհուպ մինչև ՌԴ տարածքից հեռացումը:
Այս առնչությամբ, ՄԱՀՀԻ միգրացիայի հարցերով փորձագետ Տաթևիկ Բեժանյանն «Առաջին լրատվական»-ի հետ զրույցում նշեց. «Կովիդի ընթացքում մի քանի անգամ Ռուսաստանը երկարացրեց ՌԴ-ում գտնվող միգրանտների գտնվելու ժամկետը, որովհետև կովիդով պայմանավորված մարդիկ չէին կարողանում լքել երկրի տարածքը: Հետագայում նոր որոշում կայացվեց, որով տրվեց հնարավորություն մինչև մայիսի 15-ը օրինականացնել իրենց երկրում գտնվելը, եթե ժամկետի խախտում էր առաջացել կովիդով պայմանավորված: Ավելի ուշ ՌԴ-ում գտնվելն օրինականացնելու հետ կապված ժամկետը երկարացվեց մինչև սեպտեմբերի 30-ը, հետևաբար մինչև սեպտեմբերի 30-ը, անկախ նրանից, թե մարդիկ երկիր մուտք գործելիս այցի նպատակն ինչ էին լրացրել, կարող էին օրինականացնել իրենց գտնվելը: Իսկ արդեն սեպտեմբերի 30-ից հետո այն անձինք, որոնք չեն օրինականացրել իրենց երկրում գտնվելը, կամ պետք է լքեին երկիրը, կամ հոկտեմբերի 1-ից սկսած կսկսվեն զանգվածային արտաքսումներ: Դա նշանակում է, որ Ռուսաստանի ոստիկանությանը, ազգային անվտանգության մարմիններին տրվել են հանձնարարականներ, որ իրենք կարող են կատարել ստուգումներ գործատուների մոտ, միգրացիոն հաշվառման հասցեներում և օրինախախտներին արտաքսել երկրից»:
Անդրադառնալով հնարավոր վտանգներին, փորձագետն ասաց. «Եթե անձը հաշվառված է մեկ հասցեում, բայց բնակվում է մեկ այլ հասցեում, միանշանակ արտաքսման վտանգի տակ է, որովհետև դա խախտում է համարվում: Նրանք, որոնք չունեն աշխատանքային պայմանագիր կամ ունեն ֆիկտիվ աշխատանքային պայմանագիր և աշխատում են բոլորովին այլ աշխատավայրում, նրանք ևս ենթակա են արտաքսման: Վտանգի տակ են այն անձինք, որոնք ՌԴ մուտք են գործել կովիդի սահմանափակումների ընթացքում, այսինքն օդանավով մեկնել են Մինսկ, այնտեղից ցամաքային ճանապարհով մտել են ՌԴ տարածք, և իրենց անձնագրում չի երևում կնիքը, որ օրինական մուտք են գործել ՌԴ: Այդ անձինք չգիտես ում խաբելու համար մեծ գումարներով գնել են նաև ֆիկտիվ միգրացիոն հաշվառման քարտեր, որը պետք է լրացնեին սահմանին և իրենց կարծիքով իրենք օրինականացրել են իրենց գտնվելը, բայց նրանք պարզապես խստացրել են իրենց նկատմամբ կիրառվելիք պատժամիջոցները: Որովհետև եթե հիմա նրանք միայն սահմանախախտման համար կարող էին 3-6 տարի ազատազրկման ենթարկվել, այդ հոդվածին կավելանա նաև կեղծ փաստաթղթերի ձեռքբերումը և օգտագործումը: Այսինքն մեր քաղաքացիներին առնվազն այդ վտանգները սպառնում են»:
Նա հիշեցրեց, որ ՌԴ-ում անօրինական գտնվող ՀՀ քաղաքացիների թիվը, ըստ ռուսական պաշտոնական աղբյուրների 61 հազար է. «Բայց ես վստահորեն կարող եմ ասել, որ այդ թիվը առնվազն 2-3 անգամ ավել է: Որովհետև այդ թվի տակ իրենք տեսնում են միայն այն անձանց, որոնք մինչև կովիդը միգրացիոն հաշվառման խախտում ունեն: Բոլոր նրանք, որոնք ՌԴ մուտք են գործել անօրինական ճանապարհով, և իրենց բազաներում չեն երևում, այդ անձանց իրենք չեն կարող հաշվել:
Ես փորձել եմ իմ ունեցած հնարավորություններով տեղեկացնել մեր հայրենակիցներին, որ մինչև սեպտեմբերի 30-ը կամ օրինականացնեն իրենց գտնվելը, կամ դուրս գան երկրի տարածքից: Իսկ նրանք, որոնք Բելառուսի տարածքով են մտել, նույն ճանապարհով վերադառնան, որովհետև սահմանին իրենց ուղղակի կձերբակալեն, որովհետև անօրինական սահմանազատումը ենթադրում է 3-6 տարվա ազատազրկում»: