Թուրքիան դրական է վերաբերվում Հայաստանի հետ հարաբերությունների կարգավորմանը, հայտարարել է նախագահ Էրդողանի խոսնակ Իբրահիմ Քալընը:
Թուրք բարձրաստիճան պաշտոնյան նշել է` հիմնական խնդիրը, որի պատճառով Անկարան սառեցրել էր դիվանագիտական հարաբերությունները Երևանի հետ և փակել սահմանը, «Ղարաբաղի օկուպացիան էր»: «Այժմ, երբ այդ խնդիրը լուծվել է, ըստ էության, Հայաստանի հետ հարաբերությունների կարգավորման որևէ խոչընդոտ չկա, միաժամանակ, կան Ղարաբաղի հետ կապված որոշ հարցեր, որոնք դեռ պետք է լուծվեն», ֊ ասել է նա:
Չկարգավորված հարցերի շարքում Էրդողանի խոսնակը նշել է խաղաղության համաձայնագրի բացակայությունը: «Դա անհրաժեշտ է Հայաստանին, Ադրբեջանին ու Թուրքիային: Եթե խաղաղության համաձայնագիր ստորագրվի, դա շատ լուրջ ազդեցություն կունենա տարածաշրջանային կայունության վրա», ֊ հայտարարել է Իբրահիմ Քալընը:
Թուրքագետ Հակոբ Չաքրյանը նշում է՝ հիշյալ անձը ոչ միայն Էրդողանի խոսնակն է, այլ գլխավոր խորհրդականը, իսկ թուրք անկախ դիտորդները նրան նույնիսկ քողարկված արտգործնախարար են համարում․«Նշվում է նաև, որ այդ արարածը Լոնդոնում սերտ կապերի մեջ է գլոբալ ուժերի ներկայացուցիչների հետ։ Փաստորեն սրան համարում են իրական արտգործնախարար, արտաքին խնդիրները նա է լուծում, ոչ թե Չավուշօղլուն։ Հետևաբար նրա ասածներին պետք է լուրջ վերաբերել, բայց նաև նշեմ, որ նա որևէ նոր բան չի ասել»,-«Առաջին լրատվական»-ի հետ զրույցում ասաց նա։
Մեր զրուցակցի դիտարկմամբ՝ ՀՀ իշխանությունները կաթվածահար վիճակում են ու միանգամայն նպաստավոր է, որ Թուրքիան հենց ներկա պահին կարգավորի հարաբերությունները Հայաստանի հետ․«Բացի այդ նշվում է, որ Պուտին-Էրդողան հանդիպմանը քննարկվելու է ղարաբաղյան կարգավորման 3+3 ձևաչափը։ Դա ենթադրում է, որ պետք է լինի Հայաստան, Ռուսաստան Ադրբեջան + տարածաշրջանային երկրներ՝ Իրան, Թուրքիա ու Վրաստան։ Սա է վտանգավոր։ Վրաստանն իհարկե վտանգավոր չէ, բայց Վրաստանն այնտեղ մեծ դերակատարում չի ունենա։ Պարսիկներն ու թուրքերն ինչպե՞ս են նույն ձևաչափում աշխատելու՝ սա զարմանալի է։ Իրանն էլ Հայաստանի պարագայում այնքան վստահելի բարեկամ չէ։Միաժամանակ նշվում է, որ բոլոր մասնակիցները կողմն են՝ բացառությամբ ՀՀ վարչապետ Նիկոլ Փաշինյանի։ Հուսանք, որ հետևողական կլինի Փաշինյանն ու ընդառաջ չի գնա»,-ընդգծեց նա։
Չաքրյանն ուշագրավ է համարում նաև Պուտին-Էրդողան հանդիպման ձևաչափը․«Լինելու է Պուտինը, Էրդողանը և թարգմանիչ։ Խոսակցությունը չի արձանագրվելու։ Լինելու են միայն Պուտինն ու Էրդողանը։Թուրքիայի արտգործնախարարությունը ևս չի կարողանալու մանրամասներ իմանալ, եթե դա չցանկանա Էրդողանը։ Նա էլ կասի այնքան, որքան իրեն ձեռնտու է։Երբ ՆԱՏՕ-ի գագաթաժողովի շրջանակներում Էրդողանը հանդիպեց Բայդենի հետ, նույնպես առանձնազրույցի տեսքով եղավ, ներկա էր մի թարգմանիչ, որն արտգործնախարարությունից չէր։ Իր նախկին կուսակիցներից մեկի դուստրն էր։Բայց ընդունված է, որ պաշտոնական հանդիպումների ժամանակ թարգմանիչին տրամադրում է արտգործնախարարությունը։ Հետևաբար թուրք դիտորդները ճիշտ են ասում, որ իրական արտգործնախարարը ոչ թե Չավուշօղլուն է, այլ նրա խոսնակը։ Դա է վտանգավոր։ Եթե արտգործնախարարությունից է թաքցնում, մենք շատ բան չենք իմանա»։
