Աշխատանքի և սոցիալական հարցերի նախարար Նարեկ Մկրտչյանի նախագահությամբ՝ առցանց ձևաչափով տեղի է ունեցել երեխաների իրավունքների պաշտպանության ազգային հանձնաժողովի հերթական նիստը։
Հանդիպման ընթացքում ներկայացվել են երեխաների իրավունքների պաշտպանության ոլորտում 2021 թ․ իրականացվող բարեփոխումները, անդրադարձ է կատարվել նաև երեխաների կրթական իրավունքի իրացման ուղղությամբ տարվող աշխատանքներին և սոցիալական աշխատողների ինստիտուտի զարգացմանը վերաբերող մի շարք հարցերի։
Ընդգծելով երեխաների իրավունքների պաշտպանության ոլորտում բարեփոխումների կարևորությունը՝ Նարեկ Մկրտչյանը բարձր է գնահատել նաև գործընկեր հասարակական կազմակերպությունների դերը:
«Ընտանեկան օրենսգրքում փոփոխություններ և լրացումներ իրականացնելու մասին ՀՀ օրենքի նախագծի մշակման փուլում հնարավորություն է ստեղծվել լսելի դարձնել բոլոր շահեկից կողմերի առաջարկություններն, իսկ նախագծի մշակումից հետո, ի թիվս մի շարք հանրային քննարկումների, այն քննարկվել է նաև երեխաների իրավունքների պաշտպանության հանձնաժողովի ներկայացուցիչների մասնակցությամբ, և այսօր, երբ նախագիծը ներկայացնում ենք պետական գերատեսչություններին, դրական արձագանք ենք ստանում։ Մեծածավալ բարեփոխումները պահանջում են համատեղ ջանքերի մեկտեղում․ այս ոլորտում անելիք ունեն բոլորը՝ առանց բացառության»,- ասել է նա։
Նախարարի տեղակալ Տաթևիկ Ստեփանյանն անդրադարձել է երեխաների իրավունքների պաշտպանության ոլորտում ներկայումս իրականացվող օրենսդրական բարեփոխումներին, երեխաներին տրամադրվող ծառայությունների որակի բարելավմանն ու երեխայի՝ ընտանիքում ապրելու իրավունքի իրացմանն ուղղված ծրագրերին։
Նա շեշտել է ցերեկային խնամք տրամադրող կազմակերպությունների գործունեությունը բարելավելու անհրաժեշտությունը՝ այդ գործում կարևորելով երեխաների իրավունքների պաշտպանության ազգային հանձնաժողովի ընդգրկումը։
Նիստի ընթացքում պայմանավորվածություն է ձեռք բերվել քարտեզագրել երեխաների հիմնահարցերի ոլորտում նաև ոչ պետական հաստատությունների կողմից տրամադրվող ծառայություններն ու ապահովել դրանց տարածքային համաչափ բաշխումը։
