«Առաջին լրատվական»-ի զրուցակիցն է Քրիստոնեա–ժողովրդավարական կուսակցության ղեկավար Լևոն Շիրինյանը
-ԱԺ փոխխոսնակ Իշխան Սաղաթելյանն օրերս հայտարարել էր, որ փողոցային պայքար են սկսելու, քանի որ միայն խորհրդարանական գործունեությամբ պայքարը բավարար չէ իշխանություններին հեռացնելու համար, որ բազմաթիվ ակցիաներ են անելու մինչև նոյեմբերի 9-ը: Ինչպե՞ս եք գնահատում այս հայտարարությունները:
–Ինչպես նախկինում էլ ասել եմ, հիմա էլ կրկնեմ՝ խորհրդարանական ընդդիմություն չկա, ռևանշիստներ են: Եթե հայտարարեին, որ իրենք հրաժարվում են ամեն գնով իշխանությունը փոխելու իրենց նպատակից, կդառնային ընդդիմություն: Իրենք չենք հայտարարել, հետևապես ռևանշիստներ են:
-Սեպտեմբերի 26-ին երթ անցկացրեցին, հետո մինչև նոյեմբերի 9-ը բազմաթիվ ակցիաներ և գործողություններ են իրականացնելու:
– Ինչ գործողություն են անելու, կարո՞ղ է ահաբեկչություն են անելու… փողոց են փակելու, բազմաթիվ ակցիաներ են անելու, թողնեն գնան: Այսինքն՝ մարդկանց զրկում են աշխատանքի իրավունքից: Միջին հայ քաղաքացին հազիվ ապրում է, չի նվնվում, չի բողոքում, աշխատում է: Թող տաքսու վարորդները զանգվածաբար դատի տան դրանց, գումարները վերցնեն: Կամ էլ, եթե կփակեն փողոցները, մեքենաները թող քշեն ուղիղ վրանները: Իրենք դրա իրավունքն ունեն, քանի որ մարդու իրավունքների մեջ ազատությունից և ամեն ինչից անդին ապրելու իրավունքն է:
-Պարոն Շիրինյան, խորհրդարանում արտահերթ կարգով քննարկվում էր համայնքների խոշորացման վերաբերյալ հարցը, ընդդիմությունը բոյկոտեց նիստը՝ դրանում քաղաքական նպատակ տեսնելով: Նրանք պնդում են, որ սրանով իշխանությունը ՏԻՄ ղեկավարներին հեռացնելու նպատակ է հետապնդում:
–Հիմա իրենց նպատակը իշխանություն տապալելն է: Եկան մտան խորհրդարան, գործադիր իշխանություն չդարձան, որ բոլորին ձերբակալեն, հիմա շարունակում են անկայուն վիճակը պահել: Իշխանությունը պետք է լավ աշխատի, իր խոստացած ռեֆոևրմները պետք է անի, այդքան բան: Եթե այդ ռեֆորմներն անի, մի շաբաթում ռևանշիստների հարցը կփակվի:
-Հանրային աջակցություն, սակայն, չունեն, ինչպե՞ս կարող են հաջողել:
–Այո՜, չունեն, կմաշվեն-կգնան: Բայց եթե հենց այսօրվանից չսկսեն հեղափոխական վերափոխումներ երկրում, եթե այսպես շարունակվի, հաջողություն կունենան: Քաղաքականություն թող վարեն, արմատական բարեփոխումներ իրականացնեն՝ դատարան, իրավունք, սարքեն կարգին երկիր: Իրենց հաջողությունը «Քաղաքացիական պայմանագիր» կուսակցության վատ քաղաքականության ուղիղ արտահայտությունն է: Իրենց նպատակը ոչ թե իշխանափոխություն, այլ հեղաշրջում իրականացնելն է: Նրանք որևէ կառուցողական առաջարկ չունեն, և եթե այսօր նրանց ասեն՝ երկրի վերակառուցման հաջող ծրագիր ներկայացրեք, չեն կարողանա:
–Քոչարյանն էլ նախորդ շաբաթ հանդիպել էր «Հայաստան» դաշինքի ներկայացուցիչներին և խոսել պայքարին նոր թափ հաղորդելու ակտիվանալու անհրաժեշտության մասին: Հնարավո՞ր է, որ դա առնչություն ունի նրա հետ, որ ապօրինի գույքի հետ կապված հարյուրավոր գործեր են սկսել հարուցել:
Այո, իհարկե ունի: «Հանուն հայրենիքի» կարգախոսով այդ ղժղժոցի տակ թաքցնում են՝ քրեական և այլ պատասխանատվության ենթարկվելուց խուսափելու իրենց ցանկությունը: Նաև գոհացնում են հյուսիսից եկող սառը քամիներին: Եթե նկատել եք, ակտիվացել են Անդրանիկմիհրանյանները, Բագդասարովները: Ալիևը այսօր հայտարարել է, որ ինքը բոլոր դեպքերում Քոչարյանին և Սերժ Սարգսյանին շատ էր սիրում, Նիկոլին՝ հեչ: Նիկոլին հեչ, որովհետև Նիկոլն իրենց մարդը չի, ինքը մեր ժողովրդի մարդն է: ՄԱԿ-ի ամբիոնից Ալիևը Քոչարյանին ու Սերժն գովել է, ես իրենց տեղը լինեի, գետինը կմտնեի: Գետինը մտնելու բան է, թուրքը քեզ գովում է: