Հնդկաստանը և Միացյալ Նահանգները կոչ են անում Թալիբանին ենթարկվել Աֆղանստանի վերաբերյալ ՄԱԿ -ի Անվտանգության խորհրդի բանաձևին և ընդգծել են այդ երկրում ահաբեկչության դեմ պայքարի կարևորությունը: Այս մասին ասվում է Հնդկաստանի վարչապետի և Միացյալ Նահանգների նախագահի հանդիպումից հետո տարածված համատեղ հայտարարության մեջ:
Մոդիի և Բայդենի առաջին հանդիպումը տեղի է ունեցել ուրբաթ օրը, Սպիտակ տանը: Քննարկվել է, թե Հնդկաստանն ու Միացյալ Նահանգներն ինչպես կշարունակեն ընդլայնել համագործակցությունը տարբեր ոլորտներում և միասին կզբաղվեն առանցքային հարցերի լուծմամբ, ինչպիսիք են COVID-19-ը և կլիմայի փոփոխությունը։
«Ղեկավարները որոշեցին, որ թալիբները պետք է ենթարկվեն ՄԱԿ-ի Անվտանգության խորհրդի 2593 բանաձևին (2021 թ.), որը պահանջում է, որ Աֆղանստանի տարածքը երբեք այլևս չօգտագործվի որևէ երկրի սպառնալու կամ հարձակվելու, ահաբեկիչներ պահելու կամ մարզելու, ահաբեկչական հարձակումներ պլանավորելու կամ ֆինանսավորելու համար, և ընդգծվեց Աֆղանստանում ահաբեկչության դեմ պայքարի կարևորությունը: Առաջնորդները Թալիբանին կոչ են արել պահպանել այս և մյուս բոլոր պարտավորությունները, ներառյալ երկրից Աֆղանստանի և օտարերկրյա քաղաքացիների անվտանգ, ապահով և կանոնավոր ելքի ապահովումը և հարգանքը մարդու իրավունքների, ներառյալ կանանց, երեխաների և փոքրամասնությունների ներկայացուցիչների հանդեպ», – ասվում է հայտարարության մեջ:
Մոդին և Բայդենը խոսել են Աֆղանստանում մարդասիրական օգնության տրամադրման կարևորությունից և թալիբներին կոչ արել լիարժեք և անարգել մուտք ապահովել ՄԱԿ-ի, նրա գործընկերների և մարդասիրական բոլոր կազմակերպությունների համար:
«Արտացոլելով Աֆղանստանի ժողովրդի համար զարգացման և տնտեսական հնարավորությունների խթանման իրենց երկարաժամկետ հանձնառությունը, նրանք (Միացյալ Նահանգների և Հնդկաստանի առաջնորդները – խմբ.) արտահայտեցին իրենց վճռականությունը ՝ շարունակելու սերտ համակարգումը և գործընկերների հետ աշխատանքը՝ ապահովելու համապարփակ և խաղաղ ապագա բոլոր աֆղանների համար», – ասվում է հայտարարության մեջ: