Թուրքիայի նախագահը դարձյալ անդրադարձել է հայ-թուրքական հարաբերություններին՝ Միացյալ Նահանգներից Թուրքիա վերադառնալու ճանապարհին, էրդողանը հայտարարել է, թե Հայաստանի վարչապետից դրական ուղերձներ է ստանում։ «Մենք ունենք համագործակցության տարբերակ, որն անվանում ենք հինգի կամ վեցի հարթակ։ Այս առումով մենք այս պահին դրական ուղերձներ ենք ստանում Հայաստանի վարչապետ Նիկոլ Փաշինյանից։ Դրական ուղերձների հետ մեկտեղ՝ մենք որոշ քայլեր ենք ձեռնարկում այս հարցում», Էրդողանը հավելել է, որ այս հարցը քննարկելու է Ռուսաստանի նախագահի հետ այս ամիս Սոչիում կայանալիք բանակցություններին։
Հիշեցնենք, որ ավելի վաղ էդրողանը հայտարարել էր, որ ՀՀ վարչապետն իրեն հանդիպման առաջարկ է արել Վրաստանի վարչապետի միջոցով: Թեմայի շուրջ «Առաջին Լրատվական»-ը զրուցել է ֆրանսահայ քաղաքագետ Կայծ Մինասյանի հետ:
«Անշուշտ լավ է հարաբերություններ ունենալ բոլոր հարևանների հետ, անշուշտ կարևոր են նաև Թուրքիայի հետ հարաբերությունները: Բայց մեր մոտեցումը խառն է, կա թե՛ իրական, թե զգայական մոտեցում: Պետք է շեշտը դնել իրական, իրատես մոտեցման վրա, միևնույն ժամանակ պետք է գործել հստակ, թափանցիկ, ճիշտ՝ զգայական մոտեցում ունեցողներին չվիրավորելու համար»-ընդգծեց Մինասյանը: Մեր զրուցակիցը միևնույն ժամանակ փաստեց, որ Հայաստանը հետպատերազմյան փուլում գտնվում է ոչ այնքան լավ դիրքերում, ուստի պետք է զգույշ և ավելի պատրատված խոսել Թուրքիայի հետ: «Եթե պետք է կրկնել նախորդ իշխանությունների արածը՝ Լևոն Տեր-Պետրոսյանից սկսած մինչև Սերժ Սարգսյան, կմտնենք փակուղի, որովհետև նախորդ իշխանությունները հարցի շուրջ թափանցիկ չեն աշխատել: Գաղտնի դիվանագիտության էջը փակվել է: Բացի այդ հայ-թուրքական հարաբերությունների հարցը համազգային է, հնարավոր չէ գաղտնի աշխատել, հարցը պատկանում է նաև ժողովրդին»: