Առաջիկա տարիներին Հայաստանի մարզերի խոշոր քաղաքներում կհիմնվեն 16 Թումո կենտրոններ, փոքր համայնքներում 110 Թումո տուփեր, որոնց միջոցով ծրագիրը հասանելի կդառնա 80 հազար պատանիների համար: Այս մասին տեղեկացնում է Սփյուռքի գլխավոր հանձնակատարի գրասենյակի ֆեյսբուքյան էջը։
Թումոյի ստեղծարար տեխնոլոգիաների կենտրոնի 10-ամյակի, Գյումրիում վերակառուցված կենտրոնի ներկայացմանը Թումոյի տնօրեն Մարի Լու Փափազյանը հայտարարել էր «Թումո Հայաստան. 5 տարի` 50 միլիոն դոլար» նախաձեռնության մասին, որի նպատակն է Թումոյի առաջատար կրթությունը հասանելի դարձնել Հայաստանի ու Արցախի բոլոր պատանիներին:
Նախաձեռնությանը միացած Եմենիջյան ընտանիքը նվիրաբերել է 10 միլիոն դոլար, որն օգտագործվելու է Վանաձորում, Կապանում, Կողբում Թումո կենտրոններ կառուցելու, ինչպես նաև դրանց և ներկայիս Թումո կենտրոններին կապված տուփեր տեղադրելու համար:
Մնացյալ 40 միլիոն դոլարը հավաքելու համար Թումոն հայտարարում է միջազգային դրամահավաք, որի առաջին երկու տարում հավաքված 10-ական միլիոն դոլարը երաշխավորել են կրկնապատկել Հայկական բարեգործական ընդհանուր միությունը (ՀԲԸՄ) ու Էլի և Էլզբիեթա Աքիլյանները:
