«Առաջին լրատվական»-ը զրուցել է ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանի հետ
–Պարո´ն Ալեքսանյան, Ազգային ժողովի նախագահի որոշմամբ՝ Անկախության 30-ամյակի կապակցությամբ բավականին բարձր պարգևավճարներ է տրվել խորհրդարանականներին, ինչին ի պատասխան՝ ընդդիմադիր Հայաստան դաշինքը անմիջապես մեծ աղմուկ բարձրացրեց, հանդես եկավ կոշտ հայտարարությամբ, բացի դա այն վիճարկելու են Սահմանադրական դատարանում: Ինչպե՞ս կմեկնաբանեք նման բուռն ու կոշտ արձագանքը, նաև՝ՍԴ դիմելու որոշումը, որքանո՞վ է արդարացված այսքան պարգևավճար բաժանել ստեղծված պայմաններում։
-Թող դիմեն, Սահմանադրական դատարանն էլ արդար որոշում կայացնի՝ կա դրանում ապօրինություն թե ոչ,բայց ես համոզված կասեմ,որ ապօրինի գույք կամ ապօրինի եկամուտով հարստանալու նպատակները սխալ տեղ են փնտրում.կարող են հեռու չնայել, բավական է նայեն սեփական ունեցվածքին, իրենց ձեռքբերած հսկայական ապօրինի ձեռքբերումներին, անօրինական գույքերին։ Դրանց վերաբերյալ մամուլի հրապարակումներով տեսնում ենք՝ ապօրինի գույքի բռնագանձման օրենքի հիման վրա քրեական վարույթներով հենց իրենց դաշինքի անդամները կամ վերջիններիս հետ կապ ունեցող անձինք են անցնում,իսկ այդ գումարը շատ հեռու է 500-600դոլարից,դրանք միլիոնավոր դոլարների են հասնում։ Բավական է միայն նայել, թե ինչ թանկարժեք՝ մինչև 200-300մլն դրամ արժեցող, մեքենաներից են դուրս գալիս։ Քաղաքական անազնիվ նպատակները հասկանալի են, բայց բարոյապես զարմանալի և ամոթալի է, որ այս մարդիկ անօրինաբար պետությունից գողանալով, հարստացել են, բայց հիմա 600 դոլարի կարգի գումարը իբրև բարեգործություն՝ թմբկահարելով, ցուցադրաբար, ամպագոռգոռ հայտարարություններ են կատարում։ Այս չափի պարգևավճարն միայն տոնի կապակցությամբ է տրվել, չի կրելու պարբերական բնույթ,այն սիմվոլիկ է և, կարծում եմ, ընդունելի չափերի մեջ։
– Ընթացակարգով ընդդիմության անդամները կարող էին նախապես հրաժարվել պարգևավճարից, ինչու ստանալուց հետո միայն որոշեցին ոչ միայն հրապարակային հրաժարվել,այլև հրապարակային հայտարարել այդ գումարը բարեգործության նպատակով օգտագործելու մասին։ Հարցի այսպիսի հնչեղությամբ՝ մտավախություն չունե՞ք՝ Ձեր հանդեպ լայն և հիմնավոր դժգոհություններ չեն առաջանա և հակառակը՝ իրենց քաղաքական վարկանիշն ավելի չի բարձրանա։Բացի դա՝ ՔՊ–ի պատգամավորներ նման բարեգործական քայլեր կատարե՞լ են, տեղյա՞կ եք։
-Ամբողջ խնդիրն այն է, որ նրանք կարող էին նախապես դիմում գրել աշխատակազմին և հրաժարվել պարգևավճարից, սակայն այսպես են վարվել,որպեսզի էժանագին փիառ ապահովեն,սակայն համոզված եմ՝ չեն հաջողելու,քանի որ հանրության մեծ մասը լավ գիտի՝ ինչ ճանապարհներով են հարստացել, ինչ ունեցվածքի տեր են,և այդ գումարը իրենց ունեցածի համեմատ չնչին գումարներ են։ Չի կարելի այս կարգի էժանագին ներկայացումներով բարեգործություն կատարել և հետո զարմանալ,թե ինչու ՀՀ քաղաքացին ըստ արժանվույն չգնահատեց իրենց «վեհանձն» արարքը։ Մյուս կողմից քաղաքացիները քաջատեղյակ են նաև մեր գործունեությունից,լավ գիտեն՝ինչպես ենք վաստակում,ապրում։ Ինչ վերաբերում է ՔՊ խմբակցության անդամների կողմից արված բարեգործություններին,ապա,վստահաբար հավատացնում եմ՝ դրանք քիչ թիվ չեն կազմում,պարզապես նրանք դա արել են լուռ, զուսպ, ինչպես որ հարկն է,ինչպես հարիր է իսկական քրիստնյային․չէ որ,ըստ Աստվածաշնչի էլ, բարեգործութունը քրիստոնյայի կատարելագործման միջոց է,ամենաաստվածահաճո գործերից մեկը,ուրիշների հոգսերով,ցավերով ապրելու կարողություն է,և այն անձը պետք է կատարի իր խղճի ու հոգու համար, ինչպես որ Սուրբ գիրքն է ասում․ «Զգու՛յշ եղեք, որ ձեր ողորմությունը մարդկանց առջև չանեք՝ ի ցույց նրանց.․․Այլ երբ դու ողորմություն անես, թող քո ձախ ձեռքը չիմանա, թէ ինչ է անում քո աջը, որպեսզի քո գթությունը ծածուկ լինի»։
Բացի դա՝ ես անձամբ ականատես եմ եղել՝ ինչպես են ՔՊ-ից եղել շատ պատգամավորներ,ովքեր պարբերաբար իրենց եկամտի միակ աղբյուր հանդիսացող այդ գումարները նվիրաբերել այնտեղ,որտեղ պետք է եղել, դրա կարիքն ունեցողներին,տեղյակ եմ՝ինչպես են պատերազմի ժամանակ անձնվիրությամբ կատարել բարեգործական արարքներ։
–Խոշոր գործարար Սամվել Կարապետյանի առաջարկի վերաբերյալ, որ Հայաստանում պետական լեզվի կարգավիճակ ստանան hայերենից բացի ռուսերեն ու անգլերենը որպես իշխող ուժի ներկայացուցիչ ի՞նչ կասեք։
-Ես կասեի,որ Հայոց լեզվի մասին ՀՀ օրենքը փոփոխման եթակա չէ։
