Կարմիր միսը այն սննդամթերքն է, որից առողջ սննդի հարցով որոշ մասնագետներ խորհուրդ են տալիս հրաժարվել: Թե որքան կարելի է կարմիր միս ուտել՝ առանց առողջությանը վնաս հասցնելու, Sputnik ռադիոկայանին տված հարցազրույցում պարզաբանել է սննդաբան, գաստրոէնտերոլոգ Իրինա Բերեժնայան:
Փորձագետների շրջանում չկա միակարծություն, թե որ մթերքները պետք է դասակարգվեն որպես կարմիր միս: Բժշկական գիտությունների դոկտոր, սննդաբան, գաստրոէնտերոլոգ Իրինա Բերեժնայան կարծում է, որ այդպես կարելի է անվանել միայն տավարի և գառան միսը:
Ըստ սննդաբանի՝ մսի այս տեսակները պարունակում են մարդուն անհրաժեշտ բազմաթիվ նյութեր: Դրանք են երկաթը, սելենը, օգտակար միկրոէլեմենտները, B խմբի վիտամինները և անփոխարինելի կիսաչհագեցած ճարպաթթուները, որոնք հարկավոր են իմունային, կենտրոնական նյարդային և մկանային համակարգերի համար: Հետևաբար, չարժե հրաժարվել նման միսից, վստահ է Իրինա Բերեժնայան:
Նրա խոսքով, եթե մարդը չունի որևէ հիվանդություն, ապա լիովին անվտանգ է ուտել շաբաթական մինչև 400-500 գրամ կարմիր միս:
«Միսը անհրաժեշտ է մարդու համար: Եթե դուք մարզիկ եք և ունեք բարձր ֆիզիկական ծանրաբեռնվածություն, ապա ձեզ ավելի շատ կարմիր միս է պետք, քան այն մարդուն, ով ամբողջ օրը նստում է համակարգչի սեղանի մոտ, քանի որ մկանները պահանջում են հսկայական քանակությամբ ամինաթթուներ», – բացատրել է Իրինա Բերեժնայան:
Միևնույն ժամանակ, բժիշկը նշել է, որ ավելորդ քաշ, սրտանոթային հիվանդություններ և խոլեստերինի բարձր մակարդակ ունեցող մարդիկ պետք է խուսափեն կարմիր մսի ճարպոտ տեսակներից:
«Եթե առկա է որևէ առողջական խնդիր, մենք սահմանափակում ենք որոշակի տեսակների մսի օգտագործումը՝ պայմանավորված այն հանգամանքով, որ դրանք պարունակում են մեծ քանակությամբ խոլեստերին, ճարպաթթուներ, որոնք մարդուն անհրաժեշտ չեն: Այնտեղ գտնվող տրանսճարպերը կարող են հեշտությամբ վերամշակվել օրգանիզմի կողմից և նույնքան հեշտությամբ մնալ օրգանիզմում խոլեստերինային վահանիկների տեսքով», – զգուշացրել է Իրինա Բերեժնայան:
Սննդաբանը նաև հավելել է, որ մի փոքր կտոր կարմիր միսը պարունակում է երկաթի օրական նորմը: Այս նորմը կարելի է ստանալ նաև բուսական սննդից, բայց այս դեպքում ստիպված կլինեք ուտել, օրինակ, երեք կիլոգրամ կանաչ կեղևով խնձոր կամ մեկ կիլոգրամ հնդկաձավարի շիլա: