Հայաստանի անկախությանը օրը՝ սեպտեմբերի 21-ին, Մարդու իրավունքների եվրոպական դատարանը հրապարակեց երկու որոշում ընդդեմ Հայաստանի Հանրապետության։Երկու գործն էլ առնչվում են 2008թ մարտի 1ին հայտարարված արտակարգ դրությանը:
Կառավարությունը պետք է վճարի երկու դիմումատուին էլ:
«Բարսեղյանն ընդդեմ Հայաստանի» գործով դիմումատուն «Ասպարեզ» մամուլի ակումբի նախագահ Լեւոն Բարսեղյանն է, որին կառավարությունը պետք է վճարի 1500 եվրո:
2008թ. մարտի 2-ին՝ Երեւան քաղաքում արտակարգ դրություն հայտարարելու հաջորդ օրը, նա ցանկացել է ցույց անցկացնել Գյումրիի Թատերական հրապարակում, սակայն ոստիկանությունը թույլ չի տվել։ Լեւոն Բարսեղյանը ձերբակալվել է եւ վարչական տուգանքի ենթարկվել։
Հենվելով Մարդու իրավունքների եվրոպական կոնվենցիայի 11-րդ հոդվածի վրա (հավաքների ազատություն)՝ Լեւոն Բարսեղյանը գտել է, որ ոստիկանների գործողություններն հիմնավորված չեն եղել, քանի որ Գյումրիում չի եղել բռնություն կամ անկառավարելի իրավիճակ:
Մյուս դիմումատուն «Հայկական ժամանակ» օրաթերթն է՝ «Դարեսկիզբ» ՍՊԸ-ն ընդդեմ Հայաստանի» գործով, որը նույնպես վերաբերում է 2008թ.-ին հայտարարված արտակարգ դրությանը։ Դիմումատուն վիճակարկում է արտակարգ դրության օրերին թերթի հրապարակման վրա արգելանք դնելու որոշումը (Հոդված 10՝ խոսքի ազատություն):
Դիմումատուն նաեւ պնդում է, որ ներպետական ատկյաններում խախտվել է արդար դատաքննության իրավունքը (Հոդված 6 § 1), քանի որ իրենց գործը քննած դատարանը «օրենքով սահմանված տրիբունալ չէր»:
Դատարանի որոշմամբ ՀՀ կառավարությունը 9000 եվրո կվճարի դիմումատուին:
Հիշեցնենք, որ 2008թ-ին «Հայկական ժամանակ» օրաթերթի գլխավոր խմբագիրը Նիկոլ Փաշինյանն էր,նա այդ պաշտոնը զբաղեցրել է 1999թ-ից մինչև 2012 թ.:
