VBET Պրեմիեր լիգայի 7-րդ տուրում «Նորավանքի» հետ ոչ-ոքի 0։0 խաղալուց հետո Հայաստանի գործող չեմպիոն «Ալաշկերտի» գլխավոր մարզիչ Ալեքսանդր Գրիգորյանը հրաժարական տվեց։ Վերջինս «Ալաշկերտը» գլխավորել էր այս տարվա մայիսին մրցաշրջանի ավարտի վերջնամասում։ Գրիգորյանի օրոք երևանյան թիմը դարձել էր Հայաստանի չեմպիոն, իսկ միջազգային ասպարեզում պատմական արդյունք գրանցելով հայտնվել Կոնֆերենցիաների լիգայի խմբային փուլում։ Սեպտեմբերի 14-ին կայացած մեկնարկային խաղում «Ալաշկերտը» հյուրընկալվելիս 4։1 հաշվով զիջել էր իսրայելական «Մաքաբիին»։ Հայաստանի ընթացիկ առաջնությունում Հայաստանի չեմպիոնը 2 միավորով միայն նախավերջին 9-րդ հորիզոնականում է։ Արդեն իսկ կարող ենք ասել, որ «Ալաշկերտը» գործնականում զրկվել է չեմպիոնական տիտղոսը պահպանելու հնարավորությունից։ Այո, վերջին շրջանում «Ալաշկերտում» գրանցել է խաղային անկում, որը կարող է ունենալ օբյեկտիվ և սուբյեկտիվ պատճառներ։ Եվրոպա լիգայի փլեյ-օֆֆում Շոտլանդիայի չեմպիոն «Ռենջերսի» դեմ ցուցադրած գերազանց խաղից հետո սկիզբ առավ այսպես կոչված լճացման պրոցեսը։
Բայց արդյո՞ք խաղային ռեգրեսի մեղավորը Ալեքսանդր Գրիգորյանն էր, և որքանով էր ճիշտ նրա հեռանալը։ Հիշեցնենք, որ Կոնֆերենցիաների լիգայում մեր թիմը դեռ 5 հանդիպում պետք է անցկանի։ Գրիգորյանի հեռանալուց հետո հարկ ենք համարում անել կարևոր արձանագրում։ Եթե հիմք ընդունենք «Ալաշկերտ» ակումբի պաշտոնական հայտարարությունը, ապա Գրիգորյանը ինքնակամ է հեռացել պաշտոնից։ Ընդունենք, որ ծանր իրավիճակում, կարևորագույն մրցաշարի մեկնարկում թիմը լքելը, մեղմ ասած, ճիշտ չէ։ Չի կարելի բացառել նաև, որ Գրիգորյանը հրաժարական է տվել ակումբի ղեկավարության պահանջով։ Այս տարբերակը, որը քիչ հավանակն է ևս անընդունելի է։ Գրիգորյանը գրանցել էր հայկական ակումբային պատմության ամենաբարձր ցուցանիշը և շարունակում էր ճանապարհը։ Կարևոր արձանագրում։ Վերջին 14 մրցավեճերում Հայաստանի չեմպիոնը ոչ մի հաղթանակ չի տարել հանդիպման 90 րոպեների ընթացքում։ Եվրագավաթներում մեր թիմը Ուելսի և Ղազախստանի չեմպիոններին հաղթել է լրացուցիչ ժամանակում։ Վերջին անգամ «Ալաշկերտը» հանդիպման հիմնական ժամանակում հաղթել է այս տարվա մայիսի 28-ին Հայաստանի առաջնության շրջանակներում 1։0 հաշվով առավելության հասնելով «Արարատ-Արմենիայի» նկատմամբ։ Սա վկայում է, որ «Ալաշկերտում» ի սկզբանե եղել է լուրջ խնդիրներ են եղել։ Ալեքսանդր Գրիգորյանին որոշակորեն հաջողվել էր շտկել այն, բայց․․․։ Ունենք այն ինչ ունենք։ Ինչ խոսք մարզչի փոփոխությունը կամ կադրային այլ որոշումները ակումբի ներքին խնդիրներն են։
Միևնույն ժամանակ արձանագրենք, որ ակումբը ներկայացնում է նաև մեր երկիրը։ Յուրաքանչյուր հաղթանակ պատիվ է բերում պետությանը, իսկ պարտությունը հարված հասցնում մեր հեղինակությանը։ Եթե մարզչական հրաժարականը խաղային այս փուլում տեղի ունենար այլ ակումբում գուցե ինչ-որ տեղ հասկանալի լիներ։ «Ալաշկերտում» սակայն մարզչական փոփոխությունների վերաբերյալ ֆուտբոլային ընտանիքում լեգենդներ են շրջանառվում։ Դժվար է ասել քանի անգամ է հեռանալուց հետո նորից թիմ վերադարձել Աբրահամ Խաշմանյանը։ Նման օրինակները կարելի է շարունակ թվարկել։ Ալեքսանդր Գրիգորյանը «Ռեյնջերսի» հետ հանդիպումից հետո ասել էր, որ դժվար է լինելու ներկայիս կազմով պայքարել Հայաստանի առաջնությունում և եվրագավաթներում և որ կադրային համալրումն այլընտրանք չունի։ Գրիգորյանի միանգամայն օբյակտիվ կանխատեսումը իրականացավ։ Կադրային խնդիրներից զատ «Ալաշկերտում» ծագեց նաև ևս մեկ խնդիր։ Կհաջողվի արդյո՞ք թիմին դուրս գալ ստեղծված իրավիճակից։ Հարցին պատասխանելը բավական բարդ է։ «Մենք միասին լավ ճանապարհ անցանք եվրագավաթներում։ Համենայնդեպս չեմ ամաչում իմ կատարած աշխատանքի համար։ Ինչ վերաբերում է ընթացիկ առաջնությանը, ես հասկանում եմ, որ ճգնաժամը, որի մեջ թիմը գտնվում է, ես` որպես գլխավոր մարզիչ, չեմ կարող լուծել։ Դրա համար էլ դեռ նախորդ փուլում էի ուզում հրաժարական տալ, բայց ակումբի նախագահը չընդունեց։ 5 տուրից հետո թիմը բարդ իրավիճակում է, և դա պետք է շտկել։
Ես հասկանում եմ, որ դա պետք է այլ մարզիչ անի։ Ուստի մեկ անգամ ևս շնորհակալություն եմ հայտնում «Ալաշկերտ» ֆուտբոլային ակումբին, բոլոր տղաներին և հրաժարական եմ տալիս»,- «Նորավանքի» հետ խաղից հետո ասել է Գրիգորյանը։ Այս իրավիճակում մնում է թերևս հուսալ, որ «Ալաշկերտի» նոր գլխավոր մարզչին կհաջողվի թիմին դուրս բերել ճգնաժամից։ Հաջորդ հանդիպումը Կոնֆերենցիաների լիգայում «Ալաշկերտն» անց է կացնելու սեպտեմբերի 30-ին Վազգեն Սարգսյանի անվան «Հանրապետական» մարզադաշտում հյուրընկալվելով Ֆինլանդիայի չեմպիոն «Հիկ»-ին։