ԱՄՆ նախագահ Ջո Բայդենն ու ՄԱԿ-ի գլխավոր քարտուղար Անտոնիո Գուտերեշը երկուշաբթի Նյու Յորքում՝ Գլխավոր ասամբլեայի նստաշրջանի շրջանակում կայացած հանդիպմանը քննարկել են կորոնավիրուսային պանդեմիայի դեմ պայքարը, նախապատրաստությունն առողջապահական ոլորտի նոր սպառնալիքներին, հակազդեցությունը կլիմայի փոփոխությանը, ինչպես նաև ջանքերը՝ ուղղված հակամարտությունների կանխմանը։ Այս մասին ասվում է Սպիտակ տան մամուլի ծառայության տարածած հայտարարության մեջ։
Նրանք նշել են, որ արդի գլխավոր մարտահրավերները կանխելու գործում առանցքային դեր են խաղում բազմակողմանի մոտեցումը, ժողովրդավարության պաշտպանությունն ու կանոնների վրա հիմնված միջազգային կարգը։
Բայդենն ու Գուտերեշը նշել են համատեղ աշխատանքի անհրաժեշտությունն այլ երկրների և ՄԱԿ-ի հետ՝ ողջ աշխարհում մարդու իրավունքների պաշտպանության, սննդամթերքի անվտանգության ապահովման, մարդասիրական կարիքների բավարարման, առողջապահական ոլորտի նոր սպառալիքներին նախապատրաստվելու և պանդեմիային վերջ տալու նպատակով։
Բայդենը նշել է ՄԱԿ-ի եզակի դերը բոլորի համար բարեկեցություն, խաղաղություն ու անվտանգություն ապահովելու գործում։
