Պարզվել է, որ թեյի պատրաստի ըմպելիքում կան մոտ 500 միացություններ, որոնք կարող են քլորին արձագանքել՝ առաջացնելով նոր, դեռ անհայտ և, հնարավոր է, առողջության համար վնասակար կողմնակի մթերքներ: Հետազոտության արդյունքները հրապարակվել են Environmental Science & Technology ամսագրում:
Թեյն աշխարհում ամենաշատ սպառվող ըմպելիքն է՝ խմելու ջրից հետո: Թեյի տերևի կազմը մանրակրկիտ կերպով ուսումնասիրված է, և այդ տվյալների հիման վրա գիտնականները սովորաբար եզրակացություններ են անում թեյի օգտակարության մասին՝ անտեսելով թեյ ըմպելիքի հիմնական բաղադրիչի`ջրի հատկությունները:
Երբ ծորակի եռացրած ջուրն օգտագործվում է թեյ պատրաստելու համար, այն ախտահանելու համար օգտագործվող մնացորդային քլորը կարող է արձագանքել թեյի միացություններին՝ ձևավորելով այսպես կոչված ախտահանման կողմնակի մթերքներ, որոնցից շատերը զգալի կոնցենտրացիաներով վտանգավոր են առողջության համար:
Հարավային Կարոլինայի համալսարանի ամերիկացի հետազոտողները Տյանցզինի համալսարանի չինացի գործընկերների հետ, չափել են 60 հայտնի ախտահանման կողմնակի մթերքների մակարդակը թեյի երեք հայտնի ապրանքանիշերում ՝ կանաչ Twinings, սև Earl Grey և Lipton, և անսպասելիորեն պարզել են, որ այդ նյութերի մակարդակը եփած թեյի մեջ ավելի ցածր է եղել, քան ծորակի սկզբնական ջրի մեջ: Հեղինակները դա բացատրում են նրանով, որ միացություններից շատերը գոլորշիացել են թրմելիս կամ կլանվել են թեյի տերևների կողմից:
Միևնույն ժամանակ, գիտնականները պատրաստի թեյի մեջ հայտնաբերել են բազմաթիվ անհայտ կողմնակի մթերքներ: Այս նյութերի ազդեցությունը մարդու առողջության վրա ուսումնասիրված չէ, սակայն, ըստ հեղինակների, թեյը պարունակում է մոտ 500 միացություն, ներառյալ պոլիֆենոլներ, ամինաթթուներ, կոֆեին և այլն, որոնք կարող են արձագանքել քլորին՝ առաջացնելով վնասակար նյութեր: Ավելի վաղ ապացուցվել է դրանցից որոշների կապը հղիության և ծննդաբերության ժամանակ քաղցկեղի առաջացման և բարդությունների հետ:
Օրգանական հալոգենների ընդհանուր քանակը, որը ներկայացնում է վնասակար նյութերի հիմնական մասը, թեյի մեջ մոտավորապես երկու անգամ ավելի բարձր է եղել, քան ծորակի սկզբնական ջրի մեջ: Նրանցից մոտ չորս տոկոսը հնարավոր է եղել բացահայտել: Հիմնական մասը՝ ավելի քան 12 տոկոսը, այնպիսի միացություններ են, որոնք առկա են եղել սկզբնական ջրի բաղադրության մեջ:
Չնայած այն հանգամանքին, որ թեյի օրգանական հալոգենների ընդհանուր քանակի մոտ 96 տոկոսը մնացել է չճշտված, դրանց կոնցենտրացիան, ըստ հետազոտողների, որևէ վտանգ չի ներկայացնում մարդկանց համար: Այս նյութերի անվտանգ մակարդակը գերազանցելու համար հարկավոր է օրական խմել ավելի քան 50 բաժակ թեյ: