Ամերիկացի սննդաբան Սամանթա Քեսսեթին հունական ընկույզն անվանել է այնպիսի սննդամթերք, որն օգտակար է ոչ միայն ընդհանրապես առողջության համար, այլ նպաստում է ամուր և հանգիստ քնին: Նրա խոսքերը մեջբերում է wellandgood.com կայքը: Մասնագետը խորհուրդ է տալիս քնելուց առաջ ընկույզ ուտել:
«Ընկույզը պարունակում է մի քանի միացություններ, որոնք կապված են առողջ քնի ռեժիմի հետ: Այն պարունակում է տրիպտոֆան՝ ամինաթթու, որն օրգանիզմն օգտագործում է սերոտոնին և մելատոնին արտադրելու համար, իսկ այս երկու նյութերը հարկավոր են քնի կարգավորման համար», – նշում է մասնագետը:
Բացի այդ, ընկույզում առկա մելատոնին հորմոնը կառավարում է քնի և արթնանալու ցիկլը, որը հարկավոր է խոր քնի համար: Հետևաբար, մելատոնին պարունակող հաբեր ընդունելու փոխարեն, կարելի է փորձել ընկույզ ուտել, խորհուրդ է տալիս սննդաբանը:
Բժշկուհին խորհուրդ է տալիս օրական 7-14 ընկույզ ուտել՝ դրանց ազդեցությունը լիովին զգալու համար:
