Երեկ Ազգային Ժողովում կառավարության անդամների հետ հարցուպատասխանի ժամանակ փոխվարչապետ Սուրեն Պապիկյանն անդրադարձավ խաղողի մթերման հետ կապված բողոքներին։ Պապիկյանը նշեց, որ խաղողի գնի մթերման թեմայով այսօր մթերող ընկերությունների ներկայացուցիչների հետ խորհրդակցության արդյունքում որոշվել է տեխնիկական սորտի խաղողի գինը սահմանել 130 դրամ։ Պապիկյանը նաև նշեց, որ հանդիպել է խաղողագործների հետ, որոնց միակ խնդիրը խաղողի գինն է։
Նշենք, որ Արարատի մարզի մի շարք համայնքներում բնակիչները շարունակում են բողոքի ակցիաներ։
Այս պահին էլ Արարատի կոնյակի և գինու գործարանի մոտ խաղողագործները շարունակում են բողոքի ակցիա իրականացնել։ Նշում են, որ Պապիկյանի ասածները իրականությանը չեն համապատասխանում։ Խաղողագործ Արմենը «Առաջին լրատվական»-ի հետ զրույցում, անդրադառնալով Պապիկյանի հայտարարությանը, որ մթերող ընկերությունների ներկայացուցիչների հետ խորհրդակցության արդյունքում որոշվել է տեխնիկական սորտի խաղողի գինը սահմանել 130 դրամ, նշեց, որ այդ գնի հետ էլ են համաձայն, սակայն այս գինն էլ իրենց ծախսերը չի «հանում»․
«Ամեն տարի այս ամսին մենք 50 տոկոսը մթերել ենք։ Հիմա մինչև այս ամսվա՝ սեպտեմբերի վերջ, վարկեր ունեմ վերցրած, որ պետք է փակեմ։ Ես հիմա գնամ բանկ ինչ ասեմ, ասեմ խաղող մթերել են, փողս չեն տալիս, կամ չեն մթերո՞ւմ իմ խաղողը։ Ամբողջ տարի ես աշխատել եմ, որ այս ամիս տանեմ բանկի գումարը փակեմ, իմ երեխուն էլ հաց ու ջուր առնեմ։ Հիմա ես ասենք սև ցուցակ եմ ընկնելու բանկում, քանի որ ժամանակին չեմ կարողանալու վճարել»,-ասաց խաղողագործը։
Նա նշեց, որ խաղողն այս պահին էլ մնացել է դաշտում, ստիպված 130 դրամին էլ համաձայն են․ «Սա ստացվում է՝ ձրի խաղող եմ մշակում, տանում տալիս իրենց։ Երկրի ղեկավարությունը պետք է մտածի խաղողագործների մասին»,-ասաց նա։
Արմենը նշեց, որ Հոկտեմբերյանի գործարանը 150 դրամով վերցնում է խաղող, սակայն իրենք մենք չունենք պայմանագիր Արարատի կոնյակի և գինու գործարանի հետ։
«Թող գա մարզպետը, հանդիպի ժողովրդին, ասի, որ խնդիրն այս տարբերակով կլուծենք, ասենք՝ ասում են խաղողը չի մնա, բայց արդեն ամեն օր փչանում է խաղողը, հասկացեք՝ ամեն օր է փչանում»,-ասաց հուսահատ խաղողագործը։
