«Եվրոպական հեռանկարներ «Արևելյան գործընկերություն» ծրագրի շրջանակներում և Հայաստան-Եվրոպական միություն Ասոցացման համաձայնագրի շուրջ բանակցությունների գործընթացում» համաժողովի ընթացքում ՀՀ էկոնոմիկայի նախարար Ներսես Երիցյանը, ներկայացնելով այդ համագործակցության անցած ուղին, նշեց, որ գործընկեր և համագործակցող կարգավիճակ ունեցող երկրի կարգավիճակից Հայաստանն արդեն դարձել է ԵՄ հարևան երկիր. «Սա հնարավորություն է ընձեռում զարգացնելու ԵՄ-Հայաստան համագործակցության շրջանակներից դուրս ավելի սերտ հարաբերություններ` տնտեսական ինտեգրում և քաղաքական համագործակցության խորացում»:
Երիցյանի խոսքերով, առևտրաշրջանառության ոլորտում ԵՄ-Հայաստան համագործակցությունը հնարավորություն է տվել Հայաստանին որոշակիորեն լուծել զարգացած շուկայի կանոններին ինտեգրվելու հարցը: Չափազանց կարևորելով «Արևելյան գործընկերության» ծրագիրը, Ներսես Երիցյանն ընդգծեց, որ այդ համագործակցությունը կոնկրետացնում է Եվրոպական միությանը Հայաստանի անդամակցության ժամկետները:
Ուկրաինայի ներկայացուցիչ, հանրային քաղաքականության ինստիտուտի տնօրեն Վիկտոր Չումակն էլ նկատեց, թե առևտրաշրջանառության բնագավառում ԵՄ-ն դռները փակում է գյուղատնտեսական ապրանքների ներկրման դիմաց, որպեսզի ավելի զարգացնի իր անդամ երկրների գյուղատնտեսական ապրենքների արտադրությունը: Չումակի գնահատմամբ, ԵՄ-ին ինտեգրվելու համար երկրների կառավարությունները պետք է պատրաստ լինեն ներքին ռեֆորմներ իրականացնելու. «Դեռևս այդ ռեֆորմների իրականացումը բավարար չէ: Կառավարությունները սովորել են ռեֆորմներ իմիտացնել, ԵՄ-ից ռեֆերենտներ ստանալու համար»: