Հայասանի չեմպիոն «Ալաշկերտը» սկսում է պայքարը ֆուտբոլի Կոնֆերենցիաների լիգայի խմբային փուլում։ Հիշեցնենք, որ «Ալաշկերտն» A խմբում է, որտեղ ընդգրկված են նաև ավստրիական ԼԱՍԿ-ը, Թել Ավիվի «Մաքաբին» ու Ֆինլանդիայի ՀԻԿ-ը։ Առաջին տուրում վաղը մեր թիմը Թել Ավիվում կմրցի «Մաքաբիի» հետ։ Վերջինս Իսրայելի փոխչեմպիոնն է և Կոնֆերենցիաների լիգայում պայքարը սկսել է որակավորման երկրորդ փուլից։ Այստեղ իսրայելական թիմը մրցել է Չեռնոգորիայի «Սուտիեսկայի» հետ և երկու հանդիպումներում հաղթել է 3։1 հաշվով։ Այնուհետև ընդհանուր 1։0 հաշվով հաղթել է Սլովակիայի «Տրնավային», դուրս գալով փլեյ-օֆֆ։ Կոնֆերենցիաների լիգայի խմբային փուլում «Մաքաբին» հայտնվել է երկու հանդիպումների արդյունքում 4։1 հաշվով առավելության հասնելով Կարագանդային «Շախտյորի» նկատմամբ։
Իսրայելի մեկնարկած առաջնությունում «Մաքաբին» անց է կացրել երկու հանդիպում և վաստակել մեկ միավոր։ Մասանավորապես, սեպտեմբերի 11-ին «Ալաշկերտի» առաջիկա մրցակից սեփական հարկի տակ ոչ-ոքի 1։1 է խաղացել Պետահ Տիկվայի «Մաքաբիի» հետ։ Մինչ այդ «Մաքաբին» հյուրընկալվելիս 3։1 զիջել էր «Սախնինին»։ Իսրայելական թիմի ֆուտբոլիստների տրանսֆերային արժեքի հանրագումարը կազմում է 19․6 միլիոն եվրո, մինչդեռ «Ալաշկերտի» ֆուտբոլիստների տրանսֆերային ընդհանուր արժեքը 6 միլիոն եվրո է։ «Մաքաբիի» կազմում հանդես են գալիս Իսրայելի ազգային հավաքականի միանգամից 7 ֆուտբոլիստներ։ Նրանցից դարպասապահ՝ Էյալ Գոլասան վնասվածք ունի և վաղը խաղադաշտ դուրս չի գա։ «Մաքաբիում» ելույթ են ունենում 7 լեգեոներներ։ Նրանցից կարելի է առանձնացնել հոլանդացի վինգեր Բրենդլի Կուվասին և իսպանացի ձախ պաշտպան Էնրիկ Սաբորիտին։ Վերջինս ևս վնասվածքի պատճառով բաց կթողնի վաղվա հանդիպումը։
Ինչևէ, «Ալաշկերտը» Կոնֆերենցիաների լիգայի խմբային փուլում հայտնվել էր Եվրոպա լիգայի փլեյ օֆֆում Շոտլանդիայի չեմպիոն «Ռեյնջերսի» արգելքը չհաղթահարելու արդյունքում։ «Ալաշկերտը» այս տարի պայքարը սկսել էր Չեմպիոնների լիգայի որակավորման առաջին փուլից, որտեղ առավելության էր հասել Ուելսի չեմպիոն «Կոնաս Կի Նոմադս» թիմի նկատմամբ։ Չեմպիոնների լիգայի որակավորման երկրորդ փուլում Հայաստանի չեմպիոնի մրցակիցը մոլդովական «Շերֆին» էր, որի դեմ երկու խաղերում էլ «Ալաշկերտը» պարտվեց և հայտնվեց Եվրոպա լիգայի որակավորման երրորդ փուլում, որտեղ կարողացավ հաղթահարել ղազախական «Կայրաթի» արգելքը։ Կարևորագույն մրցաշարին ընդառաջ «Ալաշկերտը» համալրել են երկու բրազիլացիներ։25-ամյա վինգեր Մաթեուս Ալեսանդրո Դոս Սանթոս Պերեյրան լեգենդար «Ֆլումինենսե» ակումբի սան է, 2 տարի հանդես է եկել Բրազիլիայի Ա Սերիան ներկայացնող թիմում։Մաթեուսը խաղացել է նաև բրազիլական «Բոտաֆոգո», «Ֆորտալեզա» և «Ատիբայա» ակումբներում։29-ամյա հարձակվող Նիքսոն Դարլանիո Ռեիս Կարդոսոն լեգենդար «Ֆլամենգոյի» սան է, 8 տարի հանդես է եկել Բրազիլիայի Ա Սերիան ներկայացնող ակումբում։Հայրենիքում Նիքսոնը ներկայացրել է նաև Ա Սերիայի «Ամերիկա Մինեյրո», ABC թիմերը, իսկ արտերկրում խաղացել է շվեդական «Կալմարում» և Մալթայի «Մոստայում»: Նախօրեին Հայաստանի չեմպիոնը համալրվել է ևս երկու խաղացողնեով։ 21-ամյա կենտրոնական պաշտպան, Հայաստանի երիտասարդական հավաքականի թեկնածու Արտյոմ Գյուրջյանը Մոսկվայի «Լոկոմոտիվի» սան է, խաղացել է ակումբի երկրորդ թիմում: Գյուրջյանը ներկայացրել է Ռուսաստանի Մ-16, Մ-17, Մ-18 և Մ-19 հավաքականները, «Լոկոմոտիվի» կազմում հանդես է եկել UEFA Youth League-ում: Դե իսկ երկրորդ նորեկը ռուս եզրային պաշտպան Եվգենի Յատչենկոն է։ Նա հայրենիքում պաշտպանել է «Դինամո», «Ուրալ», «Վոլգար», «Շիննիկ», «Մորդովիա» և «Օլիմպ-Դոլգոպրուդնի» ակումբների գույները:
Բուքմեյքերները վաղվա մրցավեճում ֆավորիտ են համարում իսրայելական ակումբին։ Վերջինիս հաղթանակի համար սահմանված է 1․28 գործակից։ Ոչ-ոքին գնահատված է 5, իսկ «Ալաշկերտի» հաղթանակը 11 գործակցով։ «Մաքաբի»-«Ալաշկերտ» հանդիպումը կսկսվի Երևանի ժամանակով 18։30-ին։ Կոնֆերենցիաների լիգայի երկրորդ տուրի հանդիպումը «Ալաշկերտը» կանցկացնի սեպտեմբերի 30-ին Վազգեն Սարգսյանի անվան «Հանրապետական» մարզադաշտում՝ մրցելով Ֆինլանդիայի չեմպիոն «Հիկի» հետ։