Ատոմային էներգիայի միջազգային գործակալության (ՄԱԳԱՏԷ) գլխավոր տնօրեն Ռաֆայել Գրոսսին շաբաթ երեկոյան կժամանի Թեհրան՝ իրանական կողմի հետ բանակցություններին մասնակցելու նպատակով։ Այս մասին հայտարարել է Իրանի ատոմային էներգիայի կազմակերպության (AEOI) պաշտոնական ներկայացուցիչ Բեհրուզ Քամալվանդին:
«Գրոսսին կժամանի մեկօրյա այցով, և համաձայնություն է ձեռք բերվել, որ նա կիրակի ՄԱԳԱՏԷ-ի և Իրանի միջև համագործակցության տարբեր ուղղություններ կքննարկի Իրանի ատոմային էներգիայի կազմակերպության ղեկավար Մոհամմադ Էսլամիի հետ»,- ասել է Բեհրուզ Քամալվանդին:
Երեքշաբթի օրը ՄԱԳԱՏԷ-ի գլխավոր տնօրեն Ռաֆայել Գրոսսին իր մտահոգությունն էր հայտնել, որ Իրանը դեռևս գործակալությանը պարզաբանումներ չի տվել ուրանի մասնիկների առկայության վերաբերյալ մի քանի վայրերում, որոնք Թեհրանի կողմից պաշտոնապես հայտարարված չեն միջուկային:
ՄԱԳԱՏԷ-ն նաև հայտնել է, որ Իրանը դեռ գործակալությանը չի տրամադրել դիտարկման սարքավորումների հասանելիություն: Ապրիլից Վիեննայում անցկացվում են բանակցություններ Իրանի և միջազգային «հնգյակի» (Ռուսաստան, Մեծ Բրիտանիա, Գերմանիա, Չինաստան և Ֆրանսիա) միջև ՝ նպատակ ունենալով վերականգնել իրանական միջուկային համաձայնագիրը իր սկզբնական տեսքով։