«Առաջին լրատվական»-ի զրուցակիցն է ԳԽ պատգամավոր Ազատ Արշակյանը։
-Պարոն Արշակյան, «Հայաստան» դաշինքի պատգամավոր, դաշնակցական Աղվան Վարդանյանն իշխանություններին խորհուրդ է տվել չշահարկել Մարտի 1-ի և Հոկտեմբերի 27-ի թեմաները, որովհետև ըստ նրա՝ դրանց բացահայտումից կարող են շատ բաներ պարզվել՝ ի վնաս գործող իշխանությունների։ Կարծում եք չկա՞ այդ գործերի բացահայտման անհրաժեշտություն այս փուլում։
-Քաղաքական հանցագործությունների բացահայտումը ընդդիմության կամ իշխանության շահերի հետ կապ չունի, դա կապված է պետության շահի հետ։ Ընդդիմությունն ու իշխանությունը անցողիկ է, նրանք այսօր կան, վաղը՝ չկան։ Իսկ պետական շահը մնայուն է և անպայման պետք է մանրամասն ու վերջնական բացահայտում լինի։ Հայ ժողովրդի համար պետք է հարցեր չմնան, բոլորս պետք է իմանանք հանցագործության պատճառները, հետևանքները, շահառուները։ Պետք է իմանանք, որ պետական հանցագործությունը՝ այնպիսին ինչպիսին հոկտեմբերի 27-ն էր, չպետք է կրկնվի։ Դրա համար պետ է կանխարգելիչ աշխատանքներ կատարվեն։ Ես կասեմ, որ բացահայտումը կանխարգելիչ գործառույթ է, որը պետք է հասցվի մինչև գործի տրամաբանական ավարտը։
-Կարծում եք ՝այսօրվա ընդդիմությանն այդ բացահայտումները ձեռնտո՞ւ են։
-Ընդդիմությանը, իշխանության որևէ թևի, հասարակությանը ձեռնտու է, որ հանցագործությունը բացահայտվի։ Իսկ ընդդիմությունը պետությանը ծառայող քաղաքական ուժ է։ Ուստի թաքցնելը վնաս է և ենթադրում է նոր հանցագործության ծրագիր։ Այդ վիճակը մեզ սպառնում է նոր հանցագործությամբ, դրա համար հանցագործությունը պետք է բացահայտվի, հանցագործներն էլ պետք է պատժվեն։ Անկախ նրանից, թե որոշ մարդիկ, քաղաքական գործիչներ՝ ինչ կարծիք ունեն։ Եվ ինչքան շուտ այդ ամենը պարզվի, այնքան լավ։
-Ամեն մեկն իր ճշմարտությունն ունի, իշխանությունը մեղադրում է ընդդիմությանը, ընդդիմությունը՝ իշխանությանը։
-Դա օրակարգից դուրս գալ է նշանակում, արդարադատության խնդիր է։ Պետության կայունությունը կախված է հենց դրանից։ Արդարադատությունն ինքը պետք է այս հարցերի պատասխանը տա։ Ընդդիմության և իշխանության քաղաքական գնահատականներն այստեղ էական չեն։ Նրանց գնահատականը կարևոր է որպես նախընտրական կոմպանիայի մի մաս, բայց ընդհանրապես դա իրավունքի ու արդարադատության խնդիր է։ Հանցագործության դեմ պետք է արդար դատաստան լինի։ Ընդդիմությունն ու իշխանությունը իրար մեջ դերերը բաժանում են, բայց հասարակությանն ու պետությանը դա առանձնապես չի հետաքրքրում։ Դա պրոպագանդա է, ագիտացիա, նախընտրական քարոզչություն։ Իսկ ընդհանրապես դա արդարադատության խնդիրն է ու դրանով պետք է զբաղվեն իրավապահ մարմիններն ու դատարանը։
