Թուրքիայում մշակվում է նոր ցամաքային կայան, որը պետք է հետևի ու կառավարի տեղական արտադրության ինքնաթիռների, անօդաչուների, հրթիռների ու հրթիռային համակարգերի աշխատանքը։Հաղորդում է Ermenihaber.am-ը։
«Mobil Telemetre» կոչվող կայանը ցուցադրության է հանվել ԱՄՆ-ի մայրաքաղաք Վաշինգտոնում անցկացվող «Satellite 2021» ցուցահանդեսում, որտեղ Թուրքիան ներկայացրել է ռազմարդյունաբերական և արբանյակային տեխնոլոգիաների ոլորտում գործունեություն ծավալող «Profen» ընկերությունների խումբը։
«Mobil Telemetre» շարժական կայանը բաղկացած է ալեհավաք համակարգից և կառավարման վահանակից։ Կայանի ստեղծման աշխատանքները սկսվել են 8 ամիս առաջ։ Ակնկալվում է, որ այն շահագործման կհանձնվի 2023 թվականին։ Դրա առաջին պատվիրատուն Թուրքիայի ռազմարդյունաբերական ընկերությունն է։ Թուրքական մամուլի համաձայն՝ կան նաև որոշ արտասահմանյան պատվիրատուներ, որոնց հետ դեռևս բանակցություններն են ընթանում։
