2022 թվականի աշխարհի առաջնության ընտրական փուլի Հայաստանի ազգային հավաքականը 6-րդ տուրից հետո 11 միավորով 2-րդն է J ենթախմբում։ Մերոնք 4 միավորով զիջում են առաջատար Գերմանիային և մեկ միավորով գերազանցում 3-րդ հորզոնականում գտնվող Ռումինիային։ Հյուսիսային Մակեդոնիայի հավաքականը 9 միավորով 4-րդն է, իսկ 5-րդ տեղում գտնվող Իսլանդիան ունի 4 միավոր։ Մրցաշարային աղյուսակը եզրափակող Լիխտենշտեյնը վաստակել է մեկ միավոր։ Արդեն իսկ կարող ենք ասել, որ վերջին 4 խաղերում առաջին և երկրորդ հորիզոնականների համար պայքարը ընթանալու է 4 հավաքականների միջև։ Ավելի ստույգ՝ Իսլանդիան և Լիխտենշտեյնը կորցրել են հնարավորությունն աշխարհի առաջնության եզրափակիչ փուլի ուղեգրի համար պայքարելու։ Եթե սթափ գնահատենք իրավիճակը պետք է ընդունենք, որ Գերմանիայի հավաքականն արդեն իսկ ապահովել է խմբում առաջին հորիզոնականը։ 2-րդ հորիզոնականի համար թեժ պայքար է սպասվում Հայաստանի, Ռումինիայի և Հյուսիսային Մակեդոնիայի հավաքականների միջև։
Վերջին երեք հանդիպումներում 6 միավոր վաստակելու դեպքում Հայաստանն այսօր 5 միավորի առավելություն կունենար Ռումինիայի նկատմամբ և 90 տոկոսով ապահոված կլիներ երկրորդ հորիզոնականը, բայց․․․։ Ֆուտբոլում «եթե»-ներ չկան և մենք ստիպված ենք հաշվի նստել այն իրավիճակի հետ, որ ունենք։ Նախորդ 6 հանդիպումներ արդեն անցյալում եմ և մեր խնդիրը պետք է լինի առաջինա հանդիպումներում անել հնարավորինն ու անհնարինը երկրորդ հորիզոնականը պահպանելու համար։ Փորձենք հասկանալ իրականում ինչպիսին են մեր հնարավորությունները փլեյ-օֆֆում հայտնվելու։ Հոկտեմբերի 8-ին կայանալիք 7-րդ տուրում մեր ազգային թիմը հյուրընկալվելու է Իսլանդիայի հավաքականին։ Նույն օրը Ռումինիան մրցակցի հարկի տակ խաղալու է Գերմանիայի հետ, իսկ Հյուսիսային Մակեդոնիան՝ Լիխտենշտեյնի։ Հավանականությունը բավական մեծ է, որ Գերմանիան և Հյուսիսային Մակեդոնիան 3-ական միավոր կվաստակեն։ Այդ դեպքում, եթե մերոնք հաղթեն Իսլանդիային 4 միավորի առավելություն կստանան Ռումինիայի և 2 միավորի առավելություն Հյուսիսային Մակեդոնիայի նկատմամբ։ Երեք օր անց Խոակին Կապառոսի թիմը Բուխարեստում կմրցի Ռումինիայի հետ, իսկ Հյուսիսային Մակեդոնիան կհյուրընկալի Գերմանիային։ Հոկտեմբերին 6 միավոր վաստակելու պարագայում Հայաստանի ազգային հավաքականը հաստատուն քայլ կկատարի դեպի փլեյ-օֆֆ։ Մասնավորապես վերջին երկու տուրերից առաջ ըստ մոտավոր հաշվարկի մեր գլխավոր թիմը 7 միավորի առավելություն կունենա Ռումինիայի և 5 միավորի առավելություն Հյուսիսային Մակեդոնիայի նկատմամբ։
Այդ դեպքում նոյեմբերի 11-ին Երևանում Հյուսիսային Մակեդոնիայի հետ նույնիսկ ոչ-ոքի խաղալու դեպքում մրցաշարի ավարտից մեկ տուր առաջ Հայաստանի հավաքականը կապահովի երկրորդ հորիզոնականը։ Վերջին տուրում՝ նոյեմբերի 14-ին Հայաստանի հավաքականը Երևանում մրցելու է Գերմանիայի ընտրանու հետ։ Սա մեր հավաքականի համար իրադարձությունների զարգացման իդեալական տարբերակն է։ Հոկտեմբերին նույնիսկ 3 կամ 4 միավոր վաստակելու դեպքում Հայաստանը կունենա իրական հնարավորություն պայքարելու երկրորդ հորիզոնականի համար։ Մեր առաջնային խնդիրն այս պահին Իսլանդիայի հավաքականին հաղթելն է։ Հաշվի առնելով խաղերի հաջորդականությունը կարող ենք ասել, որ հոկտեմբերի ցիկլը մեզ համար վճռորոշ է լինելու։ 3 միավորից քիչ վաստակելու դեպքում Հայաստանի հավաքականը գործնականում կկորցնի հնարավորությունը պայքարելու երկրորդ տեղի համար։ Լիխտենշտեյնի հետ երևանյան հանդիպումից հետո Խոակին Կապառոսը հայտարարել էր, որ վերջին չորս հանդիպումներից յուրաքանչյուրը եզրափակչի արժեք է ունենալու մեզ համար։ Առաջին եզրափակիչը տեղի կունենա ընդամենը չորս շաբաթ հետո հեռավոր Ռեյկյավիկում։
Հաշվի առնելով վերջին երեք հանդիպումներում մերոնց ցույց տված խաղն ու արդյունքը, պետք է ընդունենք, որ հավաքականում կան լուրջ խնդիրներ, որոնք վերացնելու դեպքում հնարավոր կլինի մտածել լուրջ արդյունքի մասին։ Խոակին Կապառոսն ունի 28 օր մեր ազգային թիմը կրկին բարձրության վրա բերելու համար։
Լուսանկերը՝ ՀՖՖ-ի