Ինչպե՞ս քայլել ժամանակակից տեխնոլոգիաներին համընթաց, եթե դրանք օր օրի ու ժամ առ ժամ են փոխվում: «Առաջին լրատվական»-ի խնդրանքով ծրագրավորող Լևոն Օսեյանը սովորական օգտագործողի տեսանկյունից ներկայացրեց Apple Mac և PC դյուրակիր համակարգիչների տարբերությունները:
Տեխնիկապես Mac-երը նույն PC-ներն են՝ ստեղծված Apple-ի կողմից: Intel, Des, Lenovo ֆիրմաները նոթբուքեր, համակարգիչներ պատրաստելիս օգտագործում են 3-րդ ընկերությունների կողմից ստեղծված օպերացիոն համակարգեր, օրինակ՝ Windows, Linux, բայց Apple-ի համակարգիչների վրա օգտագործվում է հենց Apple-ի ստեղծած օպերացիոն համակարգը՝ Mac OS-ը: Մեծ է դիզայնի տարբերությունը. Mac-ի դեպքում դրանով զբաղվում են «Դիսնեյի» և «Պիքսարի» մասնագետները և Apple-ը յուրահատուկ է այս առումով, իսկ PC-ն ընդամենը որոշ էլեգանտ կողմեր ունի:
Սովորաբար Apple-ի նոթբուքերն ավելի բարակ, թեթև են, ու բոլորն ընդօրինակում են այդ ոճը: Apple-ը հատուկ տեսակի վինչեստերներ՝ MacBook Air, թողարկեց, Apple-ի նոթբուքերի վերջին տարբերակները՝ TouchPad-երը, կառավարվում են բազմակի հպումներով:
Ծրագրային տեսակետից, օրինակ՝ Mac OS X-ը Linux-ի հետ կառուցվածքային նմանություններ ունի, իսկ Windows-ից շատ է տարբերվում: Windows-ը զարգացված է NT kernel-ի հիման վրա, որը փակ կոդով ծրագիր է, իսկ Mac OS-ը Linux-ի բաց հիմքով է ստեղծված, մոդիֆիկացված է, զարգացված, փոփոխություններ ունեցող տարբերակ է:
Ինտերֆեյսի տարբերությունն այն է, որ համակարգիչների հետ նոր շփվող մարդիկ ավելի հեշտ կադապտացվեն Mac OS X-ին, քան Windows-ին, որովհետև ամեն-ինչ ավելի հեշտ է գտնել, իսկ Windows-ի դեպքում մի քիչ «փորփրել» է պետք: Այս 2 ոպերացիոն համակարգերը տարբերվում են նաև ծրագրերի գրաֆիկական առումով. օրինակ՝ Mac OS-ում օգտագործվող պատկերակները (icon) հաջորդականորեն երևում են էկրանի ներքևում, իսկ Windows-ի դեպքում պետք է մի քանի մուտքեր գործել՝ բացել Microsoft-ի Program Files-ը և այլն:
Mac OS X-ը զերծ է վիրուսներից, քանի որ համակարգչային վիրուսների մեծ մասը գրվում են հենց Windows-ի համար:
Windows-ի առավելությունն այն է, որ խաղերի տեսակետից հիմնական ծրագրավորող ընկերությունները խաղեր են գրում հենց Windows-ի համար, սակայն արդեն սկսել են մատակարարել նաև Mac OS-ին, և ժամանակի ընթացքում այդ առումով ևս Windows-ի դիրքերը կթուլանան:
Բոլոր առավելությունների և տեխնիկայի վերջին ճիչը կիրառելու արդյունքում Apple ընկերության համակարգիչները 20-30%-ով ավելի թանկ են, բայց Mac OS օպերացիոն համակարգերն ավելի էժան են, քան Windows-ը: