Գվինեայում պետական հեղաշրջման փորձ կատարած զինված ապստամբների առաջնորդ, գնդապետ Մամադի Դումբույան հայտարարել է, որ պաշտոնանկ արված նախարարներին և գերատեսչությունների նախկին ղեկավարներին արգելվում է հեռանալ երկրից: Известия պարբերականի փոխանցմամբ՝ այդ մասին հայտնում է Africa Guinee պարբերականը:
Համերաշխության և զարգացման ազգային կոմիտեի նախագահի պաշտոնը զբաղեցրած Դումբույան նաև հայտարարել է պարետային ժամը չեղարկելու մասին:
Ավելի վաղ ՌԴ ԱԳՆ-ն պահանջել էր ազատ արձակել Գվինեայի նախագահ Ալֆա Կոնդեին, ինչպես նաև բանակցություններ սկսել: Ըստ ՌԴ ԱԳՆ-ի՝ Մոսկվան դեմ է իշխանության ոչ սահմանադրական փոփոխության ցանկացած փորձի:
Գվինեայի Հանրապետությունում սեպտեմբերի 5-ին պետական հեղաշրջման փորձ է կատարվել: Ըստ տեղեկությունների՝ Կոնդեն ձերբակալվել է: Նույն օրը ապստամբների առաջնորդը նշել էր, որ Կոնդեին ոչինչ չի սպառնում: Բացի դրանից, նա հայտարարել էր կառավարության լուծարման, սահմանների փակման և սահմանադրության գործողության կասեցման մասին: Դումբույան Գվինեայի բոլոր զինվորականներին հորդորել էր առայժմ մնալ զորանոցում:
Սեպտեմբերի 5-ին Եվրոպական միության արտաքին հարաբերությունների և անվտանգության քաղաքականության հարցերով գերագույն ներկայացուցիչ Ժոզեպ Բորելը դատապարտել էր Գվինեայում իշխանության բռնազավթումը: Նա ապստամբներին կոչ էր արել ազատ արձակել երկրի ղեկավարին: