Սուրբ Աստվածածնի վերափոխման կամ Խաղողօրհնեքի տոնը Հայ Առաքելական եկեղեցու հինգ Տաղավար տոներից մեկն է, որը նշվում է ամեն տարի օգոստոսի 15-ի ամենամոտ կիրակի օրը։ Այս տարի տոնը նշվում է օգոստոսի 14-ին։
Ավանդույթի համաձայն, այդ օրը մարդիկ եկեղեցի են տանում խաղողի առաջին բերքը։ Օրհնված բերքը բաժանվում է բոլոր ընտանիքներին, և պարտադիր է տարվա մեջ առաջին անգամ համտեսել հենց օրհնված խաղողը։
Սարդարապատի ազգագրության թանգարանի ազգագրագետ Սոնա Պապիկյանը տեղեկացնում է, որ Խաղողօրհնեքի ավանդությունը գալիս է դեռ նախաքրիստոնեական ժամանակաշրջանից և կապված է Նավասարդի տոնի հետ։ Խաղողօրհնեքը նախկինում եղել է պտղաբերության հովանավոր և մայրության աստվածուհի Անահիտի փառաբանման օրը։ Այդ օրը մարդիկ մատաղ են արել և Անահիտին զոհաբերել իրենց առաջին բերքը։
«Բերքի ընծայումն ուղեկցվել է տոնական միջոցառումներով՝ երգով, պարով, խաղերով։ Առատ սեղաններ են գցվել՝ տոնի ավանդական ուտեստներով և մրգերով»,- ասում է ազգագրագետը։
Հետագայում՝ քրիստոնեական շրջանում , Խաղողօրհնեքի տոնը եկեղեցին միացրել է Աստվածածնի վերափոխման տոնին, քանի որ այդ օրերին է մահացել Տիրամայրը։
Եկեղեցում օրհնվում է միայն խաղողը, որովհետև այն համարվում է ազնվագույն մրգերից մեկը, և խաղողից է պատրաստվում պատարագի գինին, որ խորհրդանշում է Քրրստոսի արյունը։
