Արցախի անկախության 30-րդ տարեդարձին նվիրված խորհրդարանական հատուկ նիստը Ստեփանակերտում խաղաղ չի անցել։ Նախապես այն բոյկոտեց Վիտալի Բալասանյանի ղեկավարած «Արդարություն» կուսակցությունը՝ իրեն հատուկ մեկնաբանություններով։ Ապա երեկվանից, լրատվական կայքերն իրար հերթ չտալով տարածում են տեսանյութ, որտեղ Արցախի անկախության տոնին նվիրված Արցախի ԱԺ հատուկ նիստին Արցախի ԱԺ-ի պատգամավորները ծափահարում են Արթուր Վանեցյանին ու Արմեն Ռուստամյանին ելույթ ունենալուց հետո, բայց չեն ծափահարում Ռուբեն Ռուբինյանին։
Քաղաքագետ Մովսես Հարությունյանի կարծիքով՝ տեսանյութում հստակ չի երևում, թե ովքեր են ծափահարողները և մենք չենք կարող միանշանակ պնդել, որ դա Արցախի խորհրդարանի միասնական դիրքորոշումն է․ «Մենք կարող ենք ենթադրել, որ ընդամենը տեղի Դաշնակցություն խմբակցությունն է այդ միջոցառումը կազմակերպել և սա ուղղակի քաղաքական շոու էր և ոչ ավելին։ Սխալ է պնդել, թե սա Արցախի ամբողջ խորհրդարանի դիրքորոշումն էր»,-«Առաջին լրատվական»-ի հետ զրույցում ասաց նա։
Մեր զրուցակցի խոսքերով՝ առկա ընդհանուր մթնոլորտը համահունչ չէ հետպատերազմական երկրին և առկա մարտահրավերներին․ «Կարծում եմ, որ այդ օրը պետք էր միասնական լինել ու հենց դա ցույց տալ թշնամուն։ Մենք միշտ ասում ենք՝ թուրքը տեսնում, ուրախանում է և սա այն դեպքերից է , երբ իսկապես՝ թուրքը տեսնում ուրախանում է, որ միասնականություն առկա չէ։ Անձերից պետք է վեր կանգնել, կա՛մ ծափահարել բոլոր դեպքերում, կա՛մ ընդհանրապես չծափահարել։ Նման կերպով սխալ մեսիջներ են հղվում թշնամական երկրներին»։
Մեր այն դիտարկմանը, թե նույն ընդդիմադիրները չեն մերժում Հայաստանից Արցախին հատկացվող գումարները, արդյոք մենք այս դեպքում գործ չունենք երկակի ստանդարտների հետ, Հարությունյանը պատասխանեց․ «Հակասություն չեմ տեսնում, քանի որ ինչպես նշեցի՝ սխալ է այս հարցը դիտարկել որպես Արցախի ընդհանուր դիրքորոշում։ Արցախի իշխանությունների, ինչպես նաև իշխող խմբակցության կողմից մենք այլ ազդակներ, հակահայաստանյան մեսիջներ չեն հղվել։ Այդ ամենը կարելի է բնորոշել որպես նեղ ընդդիմադիր շահերին սպասարկող գործողություն և ոչ ավելին»։
Մովսես Հարությունյանը կարծում է, որ ընդհանուր միասնականությունն առկա է և ընդամենը քաղաքական փոքր շոուներ անում են ընդդիմադիր ուժերը՝ թե Հայաստանում և թե՛ Արցախում։