Ճապոնական Օկինավա պրեֆեկտուրայում փորձագետները Pfizer ընկերության կորոնավիրուսային պատվաստանյութի մեջ օտար մասնիկներ են հայտնաբերել: Ենթադրաբար դրանք սրվակների ռետինե խցանների փշրանքն են: Այս մասին ասել է Ճապոնիայի նախարարների կաբինետի գլխավոր քարտուղար Կացունոբու Կատոն:
«Առողջապահության նախարարությունը կապ է հաստատել Pfizer- ի հետ, որտեղից ստացել են պատասխան, որ մեծ է հավանականությունը, որ դա սրվակի խցանի կաուչուկի փշրանքն է, որն անջատվել է ներարկիչով ոչ ճիշտ ծակման հետևանքով», – մամուլի ճեպազրույցում բացատրել է Կատոն:
Նա հիշեցրել է, որ վերջերս նմանատիպ դեպքեր են գրանցվել նաև Moderna ընկերության դեղամիջոցի հետ կապված: Սա չի ազդում երկու պատվաստանյութերի անվտանգության վրա, ասել է գլխավոր քարտուղարը:
Օգոստոսի 26 -ին Ճապոնիայի առողջապահության նախարարությունը հայտարարել էր, որ հինգ պրեֆեկտուրաներում Moderna ընկերության պատվաստանյութի մի շարք չափաբաժիններում օտար նյութեր են հայտնաբերվել: Միևնույն ժամանակ, ճապոնական դեղագործական Takeda Pharmaceutical Co. ընկերությունը, որը պատասխանատու է երկրում Moderna ընկերության պատվաստանյութի վաճառքի և տարածման համար, հայտարարել է, որ դադարեցնում է դեղամիջոցի 1.63 միլիոն չափաբաժնի օգտագործումը որպես նախազգուշական միջոց:
Հունիսի 25 -ին ԱՄՆ դեղագործական ընկերությունների գործունեությունը կարգավորող կառույցը՝ FDA- ն նախազգուշացում արեց Pfizer / BioNTech և Moderna ընկերությունների պատվաստումներից հետո սրտի հետ կապված ռիսկերի մասին: Հետաքննությունը հիմնավորվել է, որ Moderna- ի օգտագործումը կապված է սրտի հիվանդությունների առավել մեծ ռիսկի հետ, հատկապես մինչև 30 տարեկան մարդկանց համար: Միևնույն ժամանակ, Moderna- ն հրաժարվել է մեկնաբանել իրավիճակը:
