Այս տարվա շոգ եղանակի, ջրի սակավության պատճառով հայաստանյան տասնյակ ՀԷԿ-եր փաստացի խնդրի առաջ են կանգնել։ Այս հանգամանքները բացասաբար են անդրադարձել նաև արտադրած էլեկտրաէներգիայի ծավալների վրա։
Փոքր ՀԷԿ-երի միության նախագահ Նաիրա Նահապետյանը «Առաջին լրատվական»-ի հետ զրույցում ասաց, որ շատ ծանր իրավիճակ է ստեղծվել։ «Սարսափելի վիճակ է։ Այս տարվա աննախադեպ շոգը շարունակվում է դեռևս և մինչև հիմա կայանների մեծ մասը համարյա չի աշխատում, որովհետև ջուր չկա, որովհետև ոռոգման սեզոնը դեռ շարունակվում է։ Այն կայանները, որոնք աշխատում էին ոռոգման սեզոնի տակ, դեռ չեն աշխատում։ Չգիտեն ինչ է լինելու։ Միակ հույսն այն է, որ ըստ կանխատեսումների մի քանի օրից եղանակը պետք է կարգավորվի, անձրևներ սկսվեն։ Տեսնենք ինչպես կլինի»,-ասաց Նահապետյանը։
Մեր զրուցակիցն ասաց, որ դեռ նախնական հաշվարկներ չկան, թե նախորդ տարվա համեմատ որքանով է պակաս էլեկտրաէներգիա արտադրվել, քանի որ տարբեր կայաններ տարբեր վիճակի մեջ են։ Կայաններ կան, որ փակվել են, կան որ աշխատել են մի քանի օր ամսվա կտրվածքով.«Դեռ ամփոփ տվյալներ չունենք։ Երբ որ ոռոգման շրջանն ավարտվի, նոր հաշվարկ կիրականացնենք։ Մի 15 օրից ամեն ինչ պարզ կդառնա»,-ասաց Նահապետյանը։
Նշենք, որ 44-օրյա պատերազմի պատճառով Հայաստանն այլևս Արցախից հոսանք չի ստանում, քանի որ Արցախի ՀԷԿ-երի մոտ 60 տոկոսը մնացել է հակառակորդի վերահսկողության տակ գտնվող տարածքներում։ Դրա պատճառով արդեն իսկ բավական խնդիրներ էին ստեղծվել և կառավարությունը հայտարարեց, որ այդ բացը լրացնելու են Հայաստանում Ջերմակայանների արտադրած էլեկտրաէներգիայով, որը ավելի թանկ է։ Հիմա էլ ՀԷԿ-երն են սկսել ավելի քիչ ծավալի էլեկտրաէներգիա արտադրել։ Նահապետյանից հետաքրքրվեցինք՝ ինչ խնդիրներ կարող են առաջ գալ։ Մեր զրուցակցի խոսքով՝ հիմա ամառ է, հոսանքի մեծ սպառում չկա, բաց շատ ծանր կլինի, երբ գնանք դեպի ձմեռ և մնանք նույն կարգավիճակում.«Կարծում եմ, որ մինչև դա ատոմակայանի վերազինման աշխատանքները մեծ թափով առաջ կգնան ու մնացածը արդեն այդ ժամանակ պարզ կլինի։ Եթե խնդիրներ առաջանան, կսկսենք դրսից՝ Վրաստանից ներմուծել։ Բայց խնդիրներ, այո, կառաջանան, քանի որ, ինչպես ասացի կայանների մեծ մասը հիմա կանգնած են։ Շատ մեծ մտավախություններ ունենք, քանի որ այս վիճակին էլ գումարվել է ատոմակայանի կանգը՝ վերազինման նպատակներով։ Իսկ մեր սպառած էլեկտրաէներգիայի 40-45 տոկոսը տալիս էր ատոմակայանը»,-ասաց Փոքր ՀԷԿ-երի միության նախագահը։
Նահապետյանը նաև նշեց, որ բավական բարդ իրավիճակում են հայտնվել նաև ՀԷԿ-երի տնտեսվարողները։ Խնդիր է առաջացել ընդհուպ աշխատավարձերի վճարման, հարկերի, կայանների նորոգման աշխատանքների հետ կապված.«Բայց ամփոփ տվյալներ կլինեն 15 օրից մոտավորապես»,-եզրափակեց մեր զրուցակիցը։
