Ինչպես հայտնի է հոկտեմբերի 17-ին Հայաստանի մի շարք համայնքներում, այդ թվում Գյումրիում նախատեսված են տեղական ինքնակառավարման մարմինների ընտրություններ։
Առաջադրումներ դեռևս չկան, քաղաքական ուժերն էլ չեն շտապում հայտնել իրենց թեկնածուների անունները։
Շրջանառվող տեղեկությունների համաձայն իշխող «Քաղաքացիական պայմանագիր» կուսակցությունը այս պահին դիտարկում է Շիրակի մարզպետ Հովհաննես Հարությունյանի թեկնածությունը։ Գյումրու քաղաքապետի ընտրություններին իր մասնակցությունն է դիտարկում նաև ԲՀԿ-ն, որի թեկնածուն Վարդևան Գրիգորյանն է։ Վերջինս «Առաջին լրատվական»-ի հետ զրույցում հաստատեց տեղեկությունը՝ հավելելով, սակայն, որ դեռ վերջնական որոշում չկա։ «Ճիշտն ասած քաղաքական որոշում չկա դեռ կուսակցության կողմից։ Քննարկումներ գնացել են, դիտարկվում է իմ թեկնածությունը, բայց սպասում ենք ԲՀԿ-ի քաղաքական որոշմանը։ Քաղաքական որոշումից հետո ամեն ինչ պարզ կլինի»,-ասաց Վարդևանյանը։
Մեր հարցին՝ ինքն անձամբ ցանկանո՞ւմ է մասնակցել ընտրություններին, Վարդևանյանը պատասխանեց.«ճիշտն ասած, սպասում եմ կուսակցության որոշմանը։ Ինչ որշում կայացրեցին, ես այնպես էլ կանեմ»։
Վարդևանյանը դժվարացավ ասել, թե ինչ ընտրություններ են սպասվում։ Նրա խոսքով՝ մինչև քաղաքական ուժերը իրենց թեկնածուները չառաջադրեն, պարզ չլինի, թե ով է առաջադրվելու ում միջև է լինելու մրցակցությունը, դժվար է ասել՝ ընտրությունները մրցակցային են լինելու, թե ոչ։
Ի դեպ, մամուլում տեղեկություն հայտնվեց, որ իր որդու հետ կապված իրավական գործընթացից հետո Գյումրիի նախկին քաղաքապետ Վարդան Ղուկասյանը ևս որոշում է կայացրել ՀՀԿ-ի միջոցով մասնակցել ընտրություններին։ Վարդան Ղուկասյանը, սակայն, մեզ հետ զրույցում չպատասխանեց ընտրություններին իր հնարավոր մասնակցության վերաբերյալ հարցին։ Հարցը լսելուց հետո ասաց՝ ցտեսություն և անջատեց հեռախոսը։ Ամենայն հավանականությամբ ՀՀԿ-ն չի համաձայնել առաջադրել Ղուկասյանին, քանի որ վերջինս վերջին շրջանում բավական կոշտ քննադատության էր ենթարկում ՀՀԿ-ին՝ ասելով, որ ՀՀԿ-ն ներկայիս իշխանության հետ պայմանավորվածությունների մեջ է։
Թեև ի սկզբանե մամուլը գրում էր, որ «Պատիվ ունեմ» դաշինքը Գյումրիում առաջադրելու է Մարտուն Գրիգորյանին, սակայն հիմա խոսում են, որ Գրիգորյանը մտքափոխվել է։
Վերջինս «Առաջին լրատվական»-ի հետ զրույցում ասաց, որ դեռ որոշում չունի, միայն մոտ օրերս պարզ կլինի՝ կառաջադրվի, թե ոչ։
մեր հարցին՝ ՀՀԿ-ի կողմի՞ց է առաջադրվելու, թե՞ «Պատիվ ունեմ»-ի, Գրիգորյանը պատասխանեց.«Իմ ընկերների, իմ թիմակիցների»։
Մեր հստակեցնող հարցին, որ քաղաքական ուժը պետք է իրեն առաջադրի, Գրիգորյանը պատասխանեց.«Այս պահին որոշակիություն չկա։ Ես էլ իմ մասնակցության հարցը քննարկում եմ բացառապես իմ թիմակիցների, ընկերների հետ»։
Մեր հարցին՝ իր առաջադրվել-չառաջադրվելը արդյո՞ք կախվածէ նրանից, թե իշխող ուժը ում կառաջադրի Գյումրիում, նախկին պատգամավորը պատասխանեց.«Բացարձակ էական չի, ոչ մեկի ֆակտորը իմ առաջադրվելու հարցում էական չէ։ Կոնկերտ մենք մեր թիմով պետք է որոշենք, հասկանանք՝ նպտակահարմար է մեր առաջադրումը, թե ոչ։ Մոտ օրերս ամեն ինչ պարզ կլինի»,-ասաց նա։
«Լուսավոր Հայաստանն» էլ է դեռ քննարկումների մեջ, վերջնական որոշում չունեն։ Դիտարկվում է քաղաքապետի թեկնածու առաջադրել Սարիկ Մինասյանին։ ԼՀԿ ներկայացուցիչ Դավիթ Խաժակյանը մեզ հետ զրույցում ասաց, որ իրենք այս փուլում դեռ քննարկում են մասնակցության ձևաչափը, իսկ Սարիկ Մինասյանը Գյումրիի իրենց մեծ պոտենցիալ ունեցող թեկնածուներից մեկն է, բայց դեռ վերջնական որոշում չունեն։